uMthunywa
Khulu
Iphunga emlonyeni liyangihlupha
KHULU: Ngidinga usizo lwakho. Umlomo wami ulephunga elibi elingenza ngingaphatheki kahle ebantwini. Linto iyangihlupha ngiyaxubha kabili ngosuku njalo ngisebenzisa le-mouth wash. Ngicela lingisize ngoba ngikhathazekile.
Impendulo
Lalela-ke mzukulu wami. Iphunga elibi kaliveli emazinyweni livela phakathi kwamaphaphu. Liyahlupha iphunga lelo nxa ungalizwisisi ukuthi lihamba njani. Okokuqala libangwa yinyongo, udenda, isisu esigubelanayo. Lokhu kwelatshwa yikugabha ngesihlahla esiqondane lakhonokho. Nanzelela ingozi yokugabha, ungagabhi ngamanzi amanengi agcwele inkonxa njalo alesawudo, kuzakudabula amaphaphu. Gabha ngezihlahla zakhona, ezinye zilamabizo anjengovuma noma isithundo. Ungabona umuntu esithi uyakunika umuthi oyingxenye yenkomitshi yetiye ngumhlanziso lowo awulunganga. Ukugabha uyanatha amanzi amanengi alingana le-5 litha akukukhathazi njalo akudabuli maphaphu kuyakhupha inyongo lodenda. Lezinye izihlahla ezithize ziyakwenza lokho. Noma unathe umuthi wokugijimisa okuthiwa yi-caster oil, uyinathe kakhulu noma unathe i-Stametta ubuze kwabathengisa imithi.
Kafuni ngivakatshe
KHULU: Ngingumama oleminyaka engu-27 ngilendoda kodwa ihlala eGoli. Mina ngihlala eTsholotsho. Inkinga indoda le iyala ukuthi ngibe labangane, kangivumeli lokuthi ngivakatshe ngitsho lokuvakatshela izihlobo zami. Nxa ebuya ekhaya uyahambisela unina ukudla kodwa abami abazali kabathumezeli. Kafuni ngisebenze uthi kumele ngilime ngoba ngendile. Khulu ngikhathazekile emoyeni ngoba sengiphilela yena, kangisaziphileli.
Impendulo
Siyabonga mzukulu ukuzwa indaba enjengale. Into okuthiwa ngumngane emendweni ayamukeleki njalo nxa kuyikuthi wabhadala amalobolo waqeda nxa ephathela abazali bakhe izipho kuyimfanelo khonokho emuntwini ongacabangi kuhle. Nxa kuyikuthi wena uyakunanza ukuphethe kuhle ayekele inhlamba yakhe leyo yokuthi wena uziphilise ngokulima. Akusiso sintu leso kubi lokhu akwenzayo. Hlanganisa abantu bangekhaya lomeli wenu usodombo ukuze bamkhuze ngoba iqiniso yikuthi abazali bakhe labo ngiyazi ukuthi kabathokozi ngale into oyikhulumayo. Angiboni ukuthi unkosikazi ozeleyo angakhulunyelwa ngale indlela.
Siqedwa njani isibhono esikhulu?
Khulu. Linjani? Ngilomntwana olenyanga ezimbili, ulesibhono esikhulu. Bengicela ukubuza ukuthi siqedwa ngani?
Impendulo
Hatshi mzukulu, sizaphela nxa esekhulile ngoba akulula ukusiqeda ubukhulu baso. Kutsho ukuthi inkaba yakhe ayizange ibotshwe kuhle elusane, yikho okwenza ibenkulu, ngoba ayikho enye indlela okungasikwa ngayo. Isibhono salandela inkaba engabotshwanga kuhle kodwa angakhula isibhono siyancipha, njalo umnanzelele kakhulu ngoba umntwana olesibhono uyalamba kakhulu. Ulakho njalo ukuthi nxa simhlupha uvakatshele odokotela balakho ukusiquma sibe sincane.
Sesixatshaniswa liphupho
KHULU: Ngithemba uqine saka. Ngihlala lobaba wengane zami uthi yena sokukathathu engiphupha ngilele lomngane wakhe. Uyavuka engangikhulumisi ngimbuzile ukuthi why wathi yena kaphuphi amanga. Kambe sesingaxatshaniswa liphupho? Kwenziwani kusimo esifana lalesi? Okwakuqala ngangithi uyadlala kodwa sengibona ukuthi uqinisile.
Impendulo
Zwana mzukulu indoda le ilobukhwele, ayifuni ube lomusa kubangane bayo bona belethwe yiyo ngekhaya. Yena uthi angabona umamukela umngane wakhe ngekhaya abe sesithi ulobungane laye. Mtshele ukuthi khathesi ungabona umngane wakhe efika ngekhaya loba endleleni uzamceza kumbe uzivalele endlini. Lanxa yena ekhona ungaqali ukumkhulumisa. Umuntu wenkosi uzahamba edanile kodwa umkakho uzasala eselempendulo.Kwezinye izikhathi umphambuke ube ususithi ngikhathazwa liphupho lokuhlala ngiphupha ngilawe. Kodwa umkakho kehlukanisi umusa lothando, kutsho ukuthi indoda le kayikufuni uhambe labanye abantu. Ulothando olubi olulobukhwele.
