uMthunywa
silo Khulu
Isitho sami sibanga umsindo
KHULU: Ngiyalibingelela Khulu. Ngiyintombazana eleminyaka yokuzalwa engu-22 ngilomntwana olenyanga zokuzalwa ezingu-6, yilo izibulo lami. Uhlupho lwami yikuthi nxa ngingakhothama nxa sengivumbuluka lanxa ngihamba esithweni sami kuyabe kusenza umsindo onjenga nxa umuntu ekhupha umoya, ngicela lingincede Khulu ngohlupho lolu. Ngicela lingiphendule.
Impendulo
Nansi impendulo mzukulu. Yikho kwakusithi umuntu angabeletha isisu sibotshwe kusenzelwa ukuthi amathebe angaxegi. Zama ukuthi usebenzise ikhosethi ebopha isisu sakho wandise ukunatha umgugudu noma intolwane. Ungaze wakuvunula lokhu kodwa kunathe. Kuzawomisa isibeletho sakho. Ngomusa ungasebenzisi izihlahla zemvunulo ngoba amathebe akho akhuhluzeka ubeletha kodwa ngokuya kwesikhathi kuzahlangana.
Isitho sami siyaphela amandla
KHULU: Ngileminyaka engu-31. Ngilomfazi njalo ngiyatshada lonyaka. Udubo lwami yikuthi isitho sami siyaphangisa ukuphela amandla. Ngazama kubosiyazi kwala. Ngithini ngoba umfazi ngiyamthanda?
Impendulo
Zama ukuguqula ukudla okudlayo wekele ukudla kwesikhiwa. Dlana ukudla owawukuphiwa ngabazali bakho — okwesintu. Okwesibili ngithi thatha ihloka lakho ungene igusu ubelesawudo elicholiweyo ugamule isihlahla senkamasane kanye sizavuza uchago uluphosele isawudo khonapho ogamule khona. Uchago lwenkamasane lungaba lesawudo ulukhothe uginye ufulathele ungakhangeli emuva. Lokhu kuyaqeda lokukhefuzela kokuthi ngasilela mayebabo. Zama khonalokhu uphinde futhi ungazise ukuthi ususizwa njani, landela iziqondiso zami. Xwaya zonke izinto ezifubisa umzimba izidakamizwa igwayi lonke lemihlobo yalo, utshwala bonke lemihlobo yakhona funda ukugabha njalo.
Kuyangikhathaza ukungabi lengane
KHULU: Sengileminyaka emine ngitshade lentombi engathandana layo okweminyaka emibili. Kasila mntwana njalo lokhu sekuqalisile ukungikhathaza njalo labazali bami sebehlezi njalonje bengibuza ukuthi kwehlulani ukuthi sibe lemuli. Ngenzeni Khulu ngithathe omunye umfazi yini?
Impendulo
Kasivumelane mina lawe ukuthi lendoda iba yinyumba, kuvamile ukuthi abantu bathi umfazi nguye ongazaliyo. Nxa inzalo isiswelakala kanti asikho lokho, okudingakalayo yimbangela yokungazali kwenu lobabili. Khumbula phezu kwale imibuzo. Intombi yakho ithatha ithuba elinganani isezibini na? Nxa ethatha okwedlula amalanga amane ufanele anqundwe lawo malanga ngezihlahla abe mathathu kuphela. Wena umkhombisa kangaki ngobusuku? Nxa umkhombisa kabili ngobusuku noma ka5-6 ngobusuku kawubumbi umntwana kumele uqiniswe kukho konke lokhu kumele libe lembiza liyinathe lobabili. Imbiza iyabe ingeyokuqinisa iqolo lakho lelikankosikazi. Kuyesabisa, ungaphangisi ngomunye ngoba funa omunye angeza lesifo sikuqede, zama isintu ucele uthi ufuna elingakunatha lobabili lomama. Okunye ongakwenza yikubona amadokotela bahlole umgwaqo wesibeletho sakhe funa utshekile awuqondanga phakathi esibelethweni.
Ubacele khonokho ngoba nxa kunjalo ubuntu bakho bungqikila eceleni, umthambo lowu uyelulwa. Zama ukuthi nxa esemazibukweni anathe impande zesigangatsha zixutshaniswe lezikhukhukhu anathe 2 litres ngosuku. Abelokhu esithi cwi cwi iziphele imbodlela le. Angakhawula ukuba semazibukweni umjujumezele umfana. Lawe khonapho esendaweni leyo ugabhe, uhlambulule isisu, uphozise kuphele inyongo, udenda lengubhane ungaze walala udle kakhulu uqunjelwe, ufunde ukudlela ukuphila, ungaze waphilela ukudla. Licele baliphathise abadala abakibo kantombi labangakini uzakuzwa sebekhuluma ngamanqina.
Ngithandana lonina womngane usezithwele
KHULU: Ngileminyaka engu-24 yena uleminyaka engu-49, angazi ukuthi ngiqale ngaphi kodwa mana ngizame ukuyibeka kanje. Bengithandana lomama womngane wami omkhulu njalo usezithwele uthi ufuna ngimthathe sibe lomuzi sonke kodwa kuyanginzimela lokhu. Saqala ukuthandana ngesikhathi ehluphana lomkakhe kodwa uthando lwethu lwaqina okwacina kusenza ukuthi sibonane nsukuzonke. Ngeviki ephelileyo ungithumele i-sms esithi kumele sikhulume ngifike kuye lapho yikho lapho angitshele ukuthi usezithwele umthwalo wami. Ngethuka kakhulu njalo kangizange ngibe lomkhumbulo wokuthi umama lo angazithwala. Uthi uyangithanda lami ngiyamthanda kodwa ngilempilo yami njalo kangifuni ukulahlekelwa ngumngane wami. Umngane wami kazi lutho ngobudlelwano bami lonina. Ngenzeni Khulu?
Impendulo
Kusukela khathesi xwaya umngane wakho lingahambi lonke utshengisele ukumbalekela unina aze abelethe.
Kungaze kubenjalo uthule zwi uthenge konke okomntwana umthengele samntwana kanina womngane wakho.
Kulento ezakwenza umngane wakho ananzelele umthandano wenu, zama ukuthi uyehlala kwenye indawo umngane wakho aze azibonele yedwa ngomntwana ofanana lawe. Ungambalekeli umama owangakwakho lowu ungamala uzangena engozini ongakaze uyibone. Wena nyomuka kuhle kodwa ufudu lulungisela ezandleni zoluphetheyo. Isigwebo secala lakho endulo wawuzagongodwa entabeni zabathakathi ngoba abukho ubuthakathi obudlula lobu obenzileyo. Ungamhlukuluzi umama wakho ngoba uzakumahlazela emdulini.
