uMthunywa
Ngiphelelwa ngumsebenzi ngendlela ezingacaciyo
KHULU linjani? Ngilijaha elithetheyo elileminyaka engu-26 yokuzalwa, ngilohlupho lokuswela lokuphelelwa ngumsebenzi ngendlela ezingacaciyo. Angazi ukuthi ngenzenjani ngaloluhlupho. Siza umzukulu wakho Khulu.
Impendulo
Ngiyaphila mzukulu wami. Indaba enje yayilungiswa kuhle. Umuntu onjengawe kutsho ukuthi ungangena umsebenzi uba lombono lomsebenzi ungabuzanga kulabo obatholileyo. Khathesi nxa ungangena umsebenzi zama ukuthi noma into eqondane lomsebenzi uyenza ubuza komkhulu ukuba umsebenzi lo ungawuqhuba njani. Abantu bakhathesi bathanda ukulungisa lokukhungwa ikakhulu abakhulu bomsebenzi. Besebethi kulokho ngendlela endala yesintu kwakusiba lamahlamvu okumele ugeze ngawo uwanikwa ngumuntu omdala ahlalise phansi umoya wona lowo okwehleleyo. Awulabhadi kodwa ulombono ngomsebenzi okwesabisa abaphambili kwakho emsebenzini. Zama ukuzenza isigcabha, ungayeluleki abantu nxa lixoxa emsebenzini wena umutsha. Ungakhohlwa ukusebenzisa igama elithi tshefu ubonise ukuhlonipha abaphambi kwakho, umhlaba esikiwo usukuleyo ndima.
Ngiyathambisa engutsheni
Salibonani Khulu. Ngiyintombi eleminyaka engu-15, ngiyathambisa engutsheni. Kungabe kubangelwa yini lokhu?
Impendulo
Zwana mzukulu wami, kuyelatshwa lokho. Hamba ekilinika ubachasisele uhlupho lwakho. Lokho kutsho ukuthi isinye sakho silula, siyehluleka ukumumatha umchitho. Akukho ulutho olubi ngawe usesemncane, hamba ekilinika bayekuqeda lokho.
Ngangithandana lomza wejaha lami elakudala
Linjani Khulu? Ngicela ukubuza ukuthi kuqondile yini lokhu? Ngangithandana lejaha sasesisalana kodwa ngasengizwana njalo lomzawakhe. Ijaha lakuqala ngathandana lalo okwenyanga ezilitshumi sasesisehlukana kodwa khathesi sengithandana lomzawakhe. Yena kakwazi ukuthi sengilobudlelwano obunje lesihlobo sakhe.
Impendulo
Into yokuqala okumele uyazi usuwehlukanise umuntu lomzawakhe ngoba engqondweni yakhe uzakuthi wamala ngoba wawusuhambisana lomzawakhe. Ngendlela enjalo kuzakuba lokungathembeki kuwe ngoba umntwana elizamzuza uzakuba ngokabani. Khonokho kungaphumelela lithathane phakathi kwabo laba abantu bazabulalana.
Kuzakwenza wehluleke ukuhleka ebukhweni bakho ngoba ungathi uthi uyahleka omunye uzathi selibuyisene besekusiba yinto bani leyo. Thuma indoda yakho othandana layo iyecela ejaheni lakho lakudala ithi ngabona umama lowana engafanelanga ukuphuma egumeni bona bobabili bavumelane. Manje kwelinye ilanga ijaha lakho elidala lingacela ukukusomisa uzakuthini, nanzelela indaba le isengozini.
Umkami ufuna ngimwatshele izikhindi zakhe
Ngiyintombi etshade kunyanga ezine ezedluleyo. Khulu ngikhathazwa yinto eyodwa nje kuphela. Umkami ufuna ngimwatshele izikhindi zakhe ngitsho phela ama-underwear. Kanti ngumsebenzi kabani lowo Khulu? Mina ngiyenyanya. Umuntu lo lalo kumele aziwatshele impahla yakhe yangaphansi. Ngamtshela ukuthi mina ngeke ngikwenze lokhu kodwa ulokhu ethi ngiwatshe, ah mina nxa kunje ngiyatshiya umendo.
Impendulo
Zwana ntombi, zama ngamandla wonke ukuthi uzwisise indaba ethi angalimala umyeni wakho noma agule iqiniso lithi nguwe okumele umwatshele njalo umphiphe. Akusicala lokho okungenza ukuthi wena utshiye umendo. Iqiniso lokuqala yikuthi ngiyakucebisa bekezela uwatshe lezizigqoko zangaphansi. Ukutshiya kubuhlungu kakhulu ngoba lapho oya khona wena ungafiki usebenzise umthetho wakho. Ngiyathaba kakhulu ukuthi ubuze indaba enje ngoba indima yakho sesayilima ngayihlakula. Mntanami akulanto enyanyekayo ekuwatsheni impahla zomyeni wakho.
Abantu bangathathana baba nyamanye njalo khona kuvele kungumsebenzi kamama ukuhlanza impahla zomkakhe.
Njengoba usithi uyenyanya pho-ke izitshubo zomntanakho zona kawusoze uzenyanye yini?
Ijaha lami alazi ukuthi ngilomtwana
Khulu sengithole ijaha elifuna ukungithatha. Inkinga nansi akazi ukuthi ngilomntwana osekhulile okuGiredi 7.
Kusukela sahlangana ngo-2012 angikaze ngimtshele ukuthi ngilomntwana. Ngenzeni Khulu nanko phela usesiyavela ngingakaze ngimtshele? Ngiyesaba ukumtshela ngoba angazi ukuthi uzakuthatha njani lokhu?
Impendulo
Ungaze wesaba ukumtshela kodwa sebenzisa icebo nxa umtshela elithi ngiyaxolisa mngane wami, umgwaqo esiwuhambayo ulebholoho elifuna ukucatshwa ngeqiniso langokukhuluma kuhle kuwe. Wena wangikhulela ngamazwi alobunono lokunanzelela ngehluleka ukuthi ngitshele isimo esinje. Mina ngilomntwana okuGiredi 7 ngakho uthando lwami kuwe lwabalukhulu ngaze ngehluleka ukukutshela ukuthi ngilomntwana lomuntu ongazange avume ukuyavela ngakithi. Ngaphandle kwalokho uthando lulokhu lugelezela kuwe mihla yonke. Ngibika khonokho, wena uthini ngoba iqiniso lithi uthando lwethu solusiya eqinisweni elithi okulempondo akufihleki esakeni. Kodwa mina ngiyakuthanda njalo umntwana lo akasoze abe ngumthwalo wakho uzakuba ngumthwalo wabazali bami.
