uMthunywa
Sengikhathele ngokufelwa ngabantwana
NGINGUMAMA oleminyaka yokuzalwa engu-29, ngalotsholwa ngileminyaka engu-18. Izibulo lami lathi lilamaviki amabili ladlula, ngakwamukela lokhu ngazithwala futhi umntwana lo laye uthe olomnyaka lenyanga eziyisithupha wabhubha.
Sahlala iminyaka emihlanu singelamntwana sasesizama futhi. Ngomnyaka ka2014 ngabeletha umntwana oyintombazana omuhle kodwa laye wabhubha eqinile. Khulu angisakwazi ukuthi ngithini njengoba ngizalela phansi.
Kwezinye izikhathi ngoba lomkhumbulo wokuzibulala ukuze ngiphumule. Ngenzeni Khulu? Ngincedisa ngiyamfuna umntwana ozaphila njengabanye.
Impendulo
Awusatshongo mzukulu ukuba emveni kwakho konke lokhu, lathatha manyathela bani? Kumbe lagoqa izandla nje kuphela? Kuyadingakala ukuba keliphume lomkakho liyedinga kubosiwaluwalu lizwe impande yakho konke lokhu.
Ukuzibulala akungeke kukukhuphe enkingeni kodwa ukwenza kwakho lokusukumela phezulu yiyo impendulo. Njalo nxa liyimuli ekholelwa emthandazweni kuyadingakala ukuba lidinge abomoya kunye labafundisi baliphathise lomkakho, ukuze lawe ubelethe njalo wondle ingane yakho. Ngesinye isikhathi zama ukubonana labogogo bazakuncedisa kakhulu ngokukhangela indlela yesibeletho ukuba injani yona. Kungenzeka ukuba kukhona okufuna ukulungiswa yibo ogogo, bayabe bezakuphathisa ngemithi yabomama.
Thina okhulu sidume ngembiza zamaqholo labo balakho njalo balendlela zesifazana abangakuphathisa ngakho. Ithendele elihle ngelikhala ligijima hatshi elitshonisa ikhanda enhlabathini. Phakamani lomkakho libhodabhode lizaphuma lempendulo.
Ngenze njani ukuze angikhombise?
Linjani Khulu? Ngiyintombi eleminyaka engu-27 sengimtholile engimthandayo njalo olempawu zendoda engifisa ukuphila layo impilo yami yonke sehlukaniswe yikufa. Uhlupho kodwa nantu, indoda le kayikangikhombisi.
Ngincedisa Khulu ukuthi ngingenza njani ukuthi angibone njalo angikhombise. Ngiyazifela ngaye kodwa ngesaba ukumtshela ukuthi ngiyamthanda.
Impendulo
Esintwini vele kuyazila ukutshela owesilisa ukuba usemalahleni othando ngaye. Into ongayenza yikuba uzidlise satshanyana eceleni kwakhe, laye uzaze abone ukuba nansi intombi ongakha layo umuzi. Hlala ungobonana laye sonke isikhathi, ubonise ukukhathazeka ngokungamboni kwakho. Uqalise ukuba lokho okwenzayo empilweni umphathise njalo ube umeluleka ngendlela enhle yempilo. Umbonise ukuba wena ungumuntu onjani njalo othandani futhi empilweni.
Konke lokhu akuvele ekuxoxeni kwenu nje, hatshi ukuba lawe uhle uzithengise. Zama ukwazi ukuba yena empilweni uthandani phela. Esintwini sithi zithiywa ngezikudlayo. Lapha kangitsho ukuba uhle umnike icansi engalicelanga kodwa ngitsho ukuba ukhangele okunye nje empilweni lapho okule nhliziyo yakhe khona.
