uMthunywa
Ngingathwasiswa njani
KHULU, ngisabambelele kwezamasiko kodwa ngisaswela ulwazi kokunye ngakho isicelo sami yikuthi ungichazele ukuthi ngingenza kanjani ukuze ngithole inyanga engangithwasisa ngoba sengahamba ebantwini bangitshela ukuthi kufanele ngiyethwasa. Ngenza lokhu ngemva kokugula okwesikhathi eside. Nceda Khulu nxa kukhona inyanga oyaziyo ungilayele.
Impendulo
Mzukulu indaba yakho iyezwakala njalo akusonto enzima kangako. Angithi nxa kukhona ohlutshwa ngabadala kwakuthi nxa efika esangomeni simtshele ukuthi uhlutshwa ngabadala sibuye njalo simlayele lenyanga eledlozi elifana lalelo elimhluphayo okuyiyo ezamthwasisa. Kwesinye isikhathi isangoma lesi sasihle simthwasise nxa sinanzelele ukuthi kayikho inyanga enjalo. Ngalokhu kumele ubuyele kuleso sangoma esalichazela ukuthi uhlutshwa yizinyoka.
Kafuni kuyalobola
Khulu, ngithemba uphilile. Ngingumama oleminyaka yokuzalwa engu-34 njalo ngendile sengileminyaka engu-6 ngihlala lomkami kodwa kakaze ayevela ngakithi. Isimanga yikuthi ukudla uyathenga njalo uyasebenza ngakho kangisakwazi ukuthi ngenzenjani ngaye. Ngisize Khulu.
Impendulo.
Mzukulu okokuqala waphambanisa ngokuhlala lendoda ingaziwa ngabazali ngoba kuyingozi. Okwesibili umkakho lo kakuthandi ufuna ukudlala ngawe ngoba akulamuntu ongahlala lomfazi kuze kwenele umnyaka engaziwa ngakibo.
Ngokunjalo kuhle nxa kuyikuthi kalikabi lomntwana lonke ngakho umtshele ukuthi usumtshiya ungambona engathathi inyathelo umtshiye ungasaphindi uhlale lendoda engavelanga ngakini.
Kangiselayo imizwa yemacansini
Ngiyakubingelela Khulu. Mina ngingumama oleminyaka yokuzalwa engu-32, uhlupho lwami yikuthi umkami ngizwa engasangijabulisi endlini osokudala ukuthi ngimncitshe ingubo. Ngalokhu ngicela ungichazele ukuthi ngenzeni ukuze kuphele lokhu ngoba uthi usefuna ukuthatha omunye umfazi.
Impendulo
Mzukulu ngiyaluzwa uhlupho lwakho njalo khona abadala bathi ingubo yiwo umuthi emendweni njalo yizo ezichumisa indoda. Ngalokhu bekufanele uchaze ukuthi ulomntwana omncane yini njalo nxa ulaye wahlangana lomkakho umntwana esenganani? Kungenzeka ukuthi nxa wahlangana laye umntwana esaselezinyanga ezingaphansi kwe-4 kuyabe kuyiyo indaba eyabalekisa imizwa yakho.
Okunye njalo kungabe kukhona owakugangelayo ezama ukukuchithela umuzi. Ngalokhu kuzafanele uchaze lapha ukuze ngikuncedise ngokugcweleyo.
