uMthunywa
Ngingenza njani ukuze ngelatshwe
KHULU ngithemba uphilile. Mina ngiyindoda esikhulile sibili uhlupho lwami yikuthi sengihlangane labesifazana baze baba bane bezithwala kuthi nxa umkhubulo usulenyanga ezinhlanu aswele. Ngicela ungisize ungichazele ukuthi ngingenza njani ukuze ngelatshwe kulokhu.
Impendulo
Mzukulu uhlupho lwakho lukhulu sibili kodwa luyalungiseka. Khona ngokomkhuba owesifazana angaswela uyelatshwa ngokugeziswa ngakho kuzafanela uqale ukwenzela lokhu ube ususelatshwa lawe. Lapha kungenzeka ukuthi kube yisifungo esenzakala emdenini wakini ngakho kuzafanela ukuthi selatshwe kumbe kwelatshwe wena ngokomkhuba. Ukwelatshwa lokhu kudinga ithambo ledolo lendlulamithi kodwa lezinye izihlahla. Ngalokhu kungcono ungidinge ngikuchazele mathupha ngoba indaba yakho inde.
Ngithandana lendoda elomkayo, ngiqhubeke na?
Ngingumama oleminyaka yokuzalwa engu-24 ngilabantwana abangu-4 ngenda ngimncane ngazala abantwana sasesisehlukana lomkami. Khathesi ngithandana lendoda elomkayo kodwa mina akusiso sifiso sami leso ngoba ngibona angani ufuna ukudlala ngami. Kambe khulu ngingamthola yini owami kumbe ngiqhubeke nje layenalo engilaye ngoba ngiyabadinga ngiyabaswela, kabafuni umuntu olabantwana.
Impendulo
Lokhu ukudinga kumbe ukuzingela uswele kuvamile, ungathi wena ufuna indlovu uyezingela emagcekeni shuwa.
Bakhona labo obaba abafana lawe, abalezimuli zabo kodwa badinga inhlalo efana leyakho. Uhlupho wena usukukhangelele ebantwini abaqala ukuthathwa abafuna ukuqala imuli hatshi ukuqhubekela phambili. Indaba zothando kazibi zinhle nxa umuntu engena khona ngensolo, nxa ubona ukuba awulanjabulo kuhle ukuphuma.
Ukuqhubeka sekusiya ngawe ukuba ikusasa yakho uyibona njani ezandleni zalubaba. Kwesinye isikhathi ungabona kaluvilibali kube kanti yilo ubambo lwakho lonalolu. Abesilisa ngesiko lesintu balakho ukuthatha isithembo, hlala laye phansi ubuzisise ukuba ikusasa yenu ifukeme ubuhle kumbe lisemahlangeni.
Ikhona yini indoda engazaliyo?
Linjani khulu, ngicela ukubuza ukuthi ikhona yini indoda engazaliyo ngoba sengilonkosikazi okweminyaka emibili kodwa kuyala ukuthi azithwale. Umkami uthi inkinga ikimi nceda.
Impendulo
Indaba zemacansini langenhlanyelo evundileyo kazifuni ukucatshangelwa kumbe ukuthi lijikelane inyoka ephilayo.
Thathanani lesithandwa sakho liye emadokoteleni azakunceda ahlaziye uhlupho lwenu njalo abelendlela ezingalisombulula libe yimuli ethabileyo njalo ehlanyela izithelo ezinhle. Inzalo ilakho ukusweleka loba kubani.
Kungaba ngowesilisa kumbe ngowesifazana. Ngakho-ke bonani amadokotela.
