uMthunywa
Khulu
Silenkolo ezitshiyeneyo
KHULU: Linjani ukuphila lemuli yakho ngithemba liyaphila. Mina ngilijha elileminyka yokuzalwa engu-26 njalo ngifuna ukuthatha. Khulu uhlupho lwami ngolokuthi mina ngingumSabatha intombi yami le engithandana layo ikholwa ezintweni zamadlozi. Khulu sengazama ukukhulumisana laye kodwa kavumi ukutshiyana lezinto zamadlozi.
Ngathi ngiqala ukuthandana laye kazange angitshele konke lokhu. Sathi sesiphakthi wangitshela ukuba uyangithanda kodwa angeke asuke ekholweni lwakhe. Ngenzenjani Khulu ngiyamthanda laye uyangithanda kodwa mina kuyangihlupha ukuthi ngenzenjani. Kambe vele impilo izabanjani kithi nxa sesihlala sonke omunye evuka esiya enkonzweni omunye evukela emadlozini? Siza Khulu kungakonakali.
Impendulo
Lobabili linothile, indlela elizikholwayo zinothile zombili ukukholwa yikuthemba into ongayibonanga. Umehluko yilo lingathathana libe lemfuyo enengi ebukekayo emehlweni abantu lina abasebenzayo alisoze libe lokuphumula emoyeni yenu ngoba wena mSabatha ubonga usithi konke olakho kuvela kuNkulunkulu ngoJesu Khristu, kanti umkakho ubonga esithi konke okwenzuzo yenu makabongwe amadlozi akwabo. Abendulo babesithi phakathi kwabo loNkulunkulu bahanjelwa ngamadlozi, kanti ke amaSabatha athi uJesu Khristu nguye omi phakathi kwabo loNkulunkulu njalo bethula izibongo kanye lenhlupho zabo kuNkulunkulu. Mzukulu kunzima ukuthi lihlale ndawonye lentombi yakho le ngoba vele kwakube kuhle ukuthi nxa lithathana libe lokholo lunye ukuze lizwanane enkulumeni lasenhlelweni zenu ngoba phela kusasa lingaba lohlupho wena uzakuthi kasikhuleke yena athi asithethele. Lokhu kuyabe sekuyikudonselana. Kungakho-ke mzukulu ngithi hlalani phansi likhulume lizwanane libe seliphuma lesibopho sinye sokuthi lithini ngenkolo zenu.
Intombi ifuna siye emacansini
Khulu: Ngilijaha elileminyaka yokuzalwa engu-22, angikaze ngilale lowesifazane. Ngithandana lomunye untombazane ofuna siye emacansini singavikelanga. Ngenzeni Khulu ngoba mina ngiyesaba ukuba ngizathola umkhuhlane. Njalo ngingayala ukulala laye uzangala. Ngilale laye na Khulu?
Impendulo
Hatshi mfanawami ungalali laye. Mlandisele ukuthi akwenziwa lokho kungakabikelwa omunye wabadala bangakibo, kungaba ngugogo wakhe noma umalumekazi wakhe leyo yiyo iphasipoti yamacansi. Ngemva kokwazisana izihlobo lingahamba lobabili liye eNew Start liyehlolwa igazi ukuze lazi izimo zenu. Mzukulu uqonde nta ngokwesaba umkhuhlane yikho-ke ngisithi kuwe qhubeka ungangeni ocansini uze uthathe ngokwesiko selivela hlolwa legazi.
Kungakho thwalani indaba yenu yaziwe ngomunye wabadala liphangise uyovela ngakibo, ulolutho noma ungelalutho wena dinga kuphela ukwaziwa ngabadala. Zama ukwenza izinto zakho masinyane ukuze ungalahlekelwa ngumuzi wakho othembeke kangaka laye engxenye utshonjalo uyesaba ukuzithela emeveni esihlahla somkhaya kodwa wena ukhona umkhentshe wejaha.
Bathi intombi yami yisifebe
Khulu: Abazali bami kabafuni ngithathe umuntu engimfunayo, bathi yisifebe kodwa isimanga kabakaze bambone.
Ngeviki ephelileyo ngabuya laye ngizobatshengisa umama wahle wathi kafuni lakumbona ngoba ekhangeleka njengebele lendlela. Ngababuza ukuba yindaba bengamfuni bangiphendula bathi ngeke bakuchaza kodwa ukhangeleka njengesifebe. Manje ngenzeni Khulu ngoba thina sesileminyaka emihlanu sithandana kodwa angikaze ngimbone efeba. Yinto engizayithini yonale Khulu?
Impendulo
Isenzo lesi sesidunge uzulu ngoba sigcwalisa inguquko phakathi kwesizwe labahlala emhlabeni wonke jikelele.
Aluba umuntu ethatha umfazi ngokosiko lwesintu, kumele ahlanganise abazali bendoda labomfazi bazane. Lokhu kwazana kuxhunyaniswa kuhanjelwe ngummeli, othiwa ngusodombo. Usodombo uthunywa ngabakibo kajaha ukuyavelela ijaha kibo kantombi. Phambi kokuba intombi layo yaziwe ngabakwabozala lesi yisiqalelo sosiko lokwendiselana okwasendulo. Abazali bakho bayamthanda umfazi wakho njalo bafuna ukuthi ubelomfazi abamthanda ngendlela yesiko abalaziyo. Lokhu okuphambene lesiko bayamangala bathi asilo ngenelo likamakoti olusemasikweni esintu abasaziyo. Indlela ongenise ngayo umuntu omthandayo kuthiwa ngumazivelela njalo iyazila esikweni. Umuntu omthandayo ofuna ukumthatha ulungile mzukulu ngoba uhle walalela wena mhambi wendlela walandela wena lendlela wena omhuge ngayo. Khangela khathesi usebizwa — sifebe, kanti-ke indlela angene ngayo yiyo engaqondanga.
