uMthunywa
Umbuzo
KHULU ngihlezi ngizibuza ukuthi kanti kungani amajaha engangiboni. Akulangitsho loyedwa ophosa izwi kimi Khulu.
Ngiyintombi eleminyaka engu-19 yokuzalwa. Ngiyazi ukuthi kangimubi njalo ngabunjwa kuhle. Pho kuyini okwenza amadoda angangiboni Khulu
Impendulo
Uyazi mzukulu umculi odumileyo kweleGoli wacula ingoma yakhe ethi “Yonke into ilesikhathi sayo” okutsho ukuba lesakho sisendleni siyeza, kungakho ungafisi ukuba libhola lesilisa sonke nje ngokuhamba ukhonjiswa. Nxa nginanzelela iminyaka yakho, ikhomba ukuba kufanele ukuba ngabe uphathekile ngokulungisa ikusasa yakho kwezemfundo hatshi ukuzihlupha ngesilisa.
Kufanele ukuba ungabona uhlupho lwakho lukhula, ubone ogogo bakukhanyisele indlela ngokwesintwini ukuze lawe ube yisibane kwabakubonayo. Kodwa okwakhathesi bonga ukuba ulokhu useselethuba lokulungisa ikusasa yakho, kungela muntu okukhathazayo
Umbuzo
Khulu liqiniso yini ukuthi umuntu wesilisa nxa esiyachitha kumele akhiphe umoya sikhathi sonke. Ngiyake ngizwe abantu besitsho njalo besengizibuza ukuthi kungabe kuliqiniso. Kuthiwa nxa ungakhiphi umoya ngesikhathi uchitha kutsho ukuthi awuzali liqiniso yini khulu?
Impendulo
Hatshi lokhu yikuhabaza nje kwabesitwana, mfanawami. Yikho lokhu esasisithi yinkulumo yekweluseni kudala.
Akulaqiniso lokhu. Akulabudlelwano phakathi kwenhlanyelo kababa kunye lomoya ophuma ngemuva komuntu.
Ungazihluphi wena mzukulu.
Umbuzo
Khulu ngiyindoda engathathanga. Mina okwenza ngingafuni ukuthatha yikuthi ngiyenyanya omama. Angazi ukuthi ngithini kodwa ngingacabanga ukuthi bayake baye emfuleni ekupheleni kwenyanga ngizwa ngisenyanya. Ngake ngajola lomunye udade owayelitshapha.
Ngelinye ilanga ngathola etshwathike ipulasitiki egcwele ama-pads ebhokisini ngaphansi kombheda esenuka phu. Ngakhipha mhlalokhu Khulu ngahle ngamxotsha endlini yami umama lowu. Kusukela mhlalokhu ngiyenyanya omama. Sengihlale iminyaka phose emine ngingakhombisanga. Nceda Khulu.
Impendulo
Habo, isintu siyatsho ukuba, zonelwa mvu nye sibili. Kodwa lokhu owakubona kulo umama akutsho ukuba uzahlala ukubona kuye wonke owesifazana njalo ukuya esikhathini yindlela yabo bonke abesifazana kungakho ke, abesilisa kufanele samukele konke lokhu. Into engafunekiyo yikuba umama aziphathe kubi nxa esesikhathini, okunjengo kuba abonise owesilisa izinto ezimbi.
Ungaba lakho ukuba uzitholele omunye umuntu ongaphila laye kube ngumuntu ohlanzekileyo nje. Kodwa igama lakho lokujola kalihlanzekanga mzukulu wami. Nxa udinga owesifazana, dinga iluba lakho elihle ozazibula ngalo njalo uziqhaje ngalo, hatshi ukuhamba ujola nje, yikho uzahlangana lezinto ezinje.
Umbuzo
Khulu sengananzelela ukuthi mina angisakuthandi ukuya emacansini kusukela ngabeletha umntanethu ongumfana.
Ubaba yena uhlala engihlupha ngokungiqhweba mina ngingafuni. Sokuze kusithi ngibaleke emendweni. Angifuni kubanjwa Khulu. Kubangelwa yini. Ngileminyaka yokuzalwa engu-19 njalo umntanethu uselenyanga ezintathu zokuzalwa.
Impendulo
Uhlupho lwakho lulakho ukubhidliza umendo wakho mzukulu. Kuhle ukuba usukume ubonane lezalukazi zizame ukulungisa umuzi wakho ubeyiwo owayizolo, ngoba phela umuzi, ngumuzi ngecansi. Ukubeletha kwakho umfana akuhambelani lokubaleka kumbe ukufiphala kwemizwa yakho. Kungenzeka ukuba kungaba khona owaligangelayo walifakela isichitho nje endlini yenu,lokhu kuyabe kusenza ukuba nxa ukhangela umnkakho imizwa yakho ifiphale,njalo inkokhelo yakho lokhu yikuba lehlukane.
Dingani osiyazi bazame ukulikhangelela ukuba impande yohlupho kungaba ingaphi.Kumbe ngesikhathi uzithwele, kumbe ubeletha wahlukuluzeka kakhulu osekusenza ungaboni ukuqhakatheka kwamacansi. Ulakho futhi ukuba ungabona, labana abangakweluleka njalo bazame ukuthukulula ifindo ongabe ulalo {Counsellor}
Umbuzo
Ngiyindoda eleminyaka engu-28. Uhlupho lwami lumi kanje. Ngagada umtshova lomunye umama. Ngesikhathi ngisemtshoveni izigqoko zakhe zazitshengisa imilenze okwenza ngathatheka ngasengiphosa ilizwi. Sathandana kwaze kwafika kusibanga sokuthi azithwale. Umamalo wasesithi ngilobole. Mina njengomuntu owayesephelelwe ngayalobola.
Ngesikhathi ngisiyalobola ngangingazi ukuthi umama lo ulabantwana. Ngamangala sengisizwa abantu besithi kimi longuye othethe uNakazibani.
Ngemva kwalokho umama lo wabuya labantwabakhe sahlala sonke. Yimi esengibagcina. Uhlupho lwami yikuthi mina ngalobola ngingazi ukuthi ulabantwana. Ngenzeni ngoba lokhu kuyangihlupha? Kwezinye izizkhathi ngize ngifise lokubaleka.
Impendulo
Kulusisi mzukulu, ukuba wena wakhombisela umuntu ukubona amathangazi akhe kuphela.Esintwini kuthiwa inkiwane enhle, ibolile phakathi.Wena wabona amathangazi ungazi ukuthi kuboliwe ngaphakathi.Ngelinye ilixha, kuthiwa ungamula isihlale uthathe lamaxolo aso, pho wena kutheni usufuna ukwehlukanisa isihlahla lamaxolo aso nje.
Eqinisweni, waungeke wehlukanisa umfazi labantwabakhe, kungaba kuhle ukuba umtshele iqiniso, uzikhulule uhambe ngoba wonke umtwana okhulayo udinga ukuba lonina hatshi ukukhula eseyintandane wena uhleli lonina.Ukubaleka akusiyo ndlela enhle.Hlalani phansi njengabantu abadala likhulume, livumelane, lawe ube ususuka ke, ukuze laye asale ezitholela ofuna isihlahla lamaxolo aso.
