uMthunywa
Thokozile Mbedzi
LOKHU zikhuza umhlola njalo zitshwaqe imzimba izakhamizi zesigabeni seKarungunya, eGokwe ngaphansi kwenduna uChireya ngemva kokuba esinye isakhamuzi sakule indawo sithumele induna inkalakatha yohalabezi lwenyoka ekhulumayo kubangwa ubuduna.
Insumansumane le yenzakale kuviki ephelileyo lapho induna uChireya othunyelwe khona inhlathu ekhulumayo nguMnumzana John Kaparapate Zingava ukuthi izothatha ubuduna bakhe, uMthunywa uyakuveza lokhu namhlanje.
Kubikwa ngemva kokubonakala kwenyoka le uMnu Zingava wabanjwa egumeni lenduna phakathi kobusuku ethi uzoloya induna ukuze athathe isihlalo sayo.
UMthunywa uxhumane lepholisa lenduna uMnumzana Tapiwa Choga wachaza ukuthi inyoka le yathutsha ebusuku bamangala ikhuluma ithi isikhathi sokubusa kwenduna sesiphelile sokuzabusa yona yasihamba.
“Mina ngangilindile emzini wenduna phakathi kobusuku ngezwa kulomuntu okhulumayo ngakhanyisa ngabona yinyoka. Ngagijima ngayavusa induna labanye abantu bakulelikhaya labo bazoyibona inyoka le.
“Ekukhulumeni kwayo yathi isikhathi sokubusa kwenduna sesiphelile ngakho sokuzabusa yona ukuze kube lokuthula esigabeni. Samangala sonke njalo kakho owaba lesibindi sokuyitshaya inyoka le yaze yahamba,” kutsho uMnu Choga.
UMnumzana Tendai Chireya oyisihlobo senduna uthe kwathi ngelanga lesine kwenzakele lokhu uMnu Zingava wabuya enqunu lenyanga yakhe emzini wenduna abantu babakhanda besenza imithanithani yabo egumeni lenduna okwabangela ukuthi bacele ezinyaweni andubana babanjwe yizakhamizi.
“Sathi sisathithibele ngenyoka le ekhulumayo ukuthi ivela ngaphi ngelanga lesine silele phakathi kobusuku sezwa umsindo wabantu abakhulumayo savuka abantu laba babaleka sabaxotshanisa sabamba uZingava enqunu. Sathi simbuza ukuthi ubehamba lobani wathi ubehamba lenyanga yakhe ngakho ibalekile yamtshiya.
“Okwangimangalisayo yikuthi babebophele inkalakatha yeqhude esihlahleni phakathi kweguma bethi iqhude leli belizoncedisa ukuthi bakhiphe induna esihlalweni ngoba kumele kungene yena ngoba ubuduna lobu ngobangakibo.
Wabuya wathi inyoka le ekhulumayo yathunywa nguye ngakho bebengakaqedisi ukuthama kwabo ukuze athathe ubuduna,” kulandisa uMnu Chireya.
UMnu Zingava ebuzwa ngale indaba uvumile wathi kodwa ngeke akhulume lutho ngoba wathonisiswa yinduna wahlawula noma nje engakaqedi ukuhlawula kwakhona.
“Kuliqiniso sibili kodwa mina ngeke ngikhulume okunengi ngoba ngathonisiswa yinduna ngahlawula inkomo ezimbili kwasala eyodwa njalo ngisazoyibhadala,” kutsho uMnu Zingava. Ibuzwa ngale indaba induna uChireya ivumile ukuthi indaba le yenzakala yathi kayilankani ngayo njalo imhlawulisile lo obezama ukuyigangela.
“Kuliqiniso sibili ukuthi kwathutsha inyoka ekhulumayo emzini wami lami nginje ngayibona ngamehlo ngakho kangilamathe ngilapha. Ngemva kwalokho ngabamba uZingava emzini wami phakathi kobusuku enqunu ethi ubezongithakatha wabuya wathi nguye owathuma inyoka le.
“Lokhu kwenza ngakholwa sibili ukuthi abantu bayathakatha phandle lapha ngasengimhlawulisa inkomo ezintathu kodwa usekhuphe ezimbili kwasala eyodwa,” kuphetha induna uChireya.
