uMthunywa
Blessing Moyo
ABE-sebexwayise abalimi abafuyileyo ukuthi bananzelele ukuthi inkomo zabo nxa zizala ingqwatshi iyaphuma ukuze kungaphambanisi impilakahle yesifuyo sabo.
Udokotela wezifuyo uDokotela Ndabezinhle Mkhwananzi uthe ukusalela kwengqwatshi enkomeni esanda kuzala kubangela ukuthi inkomo icine isisehluleka ukudla njalo ingasehlisi kukanti yona iyabe ilethole.
Uthe ukusalela kwengqwatshi kubangelwa yikusilela kukaVitamin E emzimbeni wesifuyo, ukuguquka komumo womkhathi kunye lemikhuhlane ebangelwa ngamagcikwane abizwa ngokuthi ngama-uterine infections.
“Kulembangela ezingaba ntathu ezingenza ingqwatshi isalele nxa inkomo izala ezibalisa ukuswelakala kukaVitamin E emzimbeni wenkomo lokutshintshatshintsha komumo womkhathi okunye kanye lemikhuhlane ebangelwa ngamagcikwane abakhona nxa inkomo ichama ebizwa ngokuthiwa ngama-uterine infections.
“Inkomo esalele ungqwatshi ibonakala ngokwehlisa uchago olulutshwane ngemva kwamalanga alitshumi izele kodwa-ke inkomo leyo kwesinye isikhathi isuke ingakhanyi ukuthi isezihlungwini.
Ngokuya kwesikhathi icina isisehluleka ukudla njalo lokukhupha izinto ezinukayo esithweni sayo, yikho okutshengisela ukuthi inkomo le isalele ungqwatshi esiswini,” kulandisa uDkt Mkhwananzi.
“Ithole lingaba likhulu kakhulu kumbe nxa inkomo izele amaphahla ungqwatshi wandise ukusalela. Okunye njalo ukuswelakala kwamandla enkomeni loVitamin A kwenza inkomo icine isisalele ungqwatshi.
Inkomo
Uqhubekele phambili esithi ukusalela kwengqwatshi ngumkhuhlane oyelaphekayo. Uthe inkomo ingazisiza yona ngokwayo ngokukhipha ungqwatshi osaleleyo.
“Umlimi nxa engananzelela ukuthi inkomo yakhe ikhupha okunukayo esithweni sayo kumele aphuthume abone odokotela ababona ngezezifuyo ukuze athole usizo.
Uthe umlimi okunye angakwenza ukuvikela inkomo zakhe ukuthi zingasaleli ungqwatshi ngesikhathi ziqeda kuzala yikubona ukuthi ngesikhathi zimithi kazinoni okwedlulisileyo kunye lokuthi kazicaki.
UDkt Mkhwananzi uphethe ngokuxwayisa abalimi ukuthi babone ukuthi inkomo zabo ziyathola ama-vitamin lama minerals emzimbeni ngesikhathi zimithi.
