uMthunywa
INDODA okusolwa ukuthi ibidle izidakamizwa ivulele ngenhlamvu emgwaqweni kulabantu ebebezihambela emarobhothini kwaV, eMlaza, maqede yabhekisa isibhamu kuyo yazidubula yafa ngoMvulo.
Indoda, eyaziwa ngokuthi ingumakhi wezindlu odabuka kwelinye lamazwe ase-Afrika, kuthiwa inguMnumzana Sdu Sithole. Imangaze abanengi ngesikhathi imisa imota erobhothini kwaV, yaphuma yavulela inhlamvu esidlangaleni, kungaziwa ukuthi idubula bani.
Kuthiwa kukhale ubumayemaye abantu bebaleka nxa zonke. Kuthiwa ibonakale sengathi iyakujabulela lokhu ngesikhathi ikwenza ngoba ibigibele okhakhayini lwemota. Ibidubula ibuye igxumele phansi idubule iyizungeze imota. Kuthe kusenjalo kwaqhamuka amapholisa, athe engakafiki kuyo yabhekisa isibhamu kuyo yazidubula yafela lapho.
Omunye ozibonele lokhu kusenzakala kodwa ongathandanga ukuthi igama lakhe lidalulwe, uthe uSithole ubengapheli kwaV futhi uyaziwa khona. Ubejwayele ukuhamba labantu abakha izindlu emoteni yakhe.
“Uyaziwa kule indawo yize ngingamazi ukuthi uhlala kuphi. Ngiyacabanga ukuthi uhlala khona kwaV, siyazi lokuthi uyaphuza futhi ubuye asebenzise lezidakamizwa kodwa bekungakaze kwenzeke ukuthi akhiphe isibhamu. Bekungathi sibuka ifilimu, angazi noma kukhona yini abekutsho ngoba sonke bese sicatshile sesaba ukudubuleka. Ngiyasola ukuthi ubedle izidakamizwa, akekho umuntu obengenza into enje edakwe butshwala kuphela. Ucitshe walimaza abantu ngoba lindawo iyaphithizela,” kutsho yena.
Kulenqwaba yezitolo, kuphinde kume lamatekisi labantu abanamatafula abadayisayo kuleli robhothi. Kuhlale kuphithizela kulo njengoba uma ungena noma uphuma eMlaza udlula kulona.
Ngesikhathi ithimba leSolezwe lifika endaweni izihlobo zikamufi bezidangele, zime eduze kwesidumbu sakhe zisalinde ukuthi sithathwe yimota ethatha izidumbu.
Imota yakhe iCiti Golf emhlophe ibimi erobhothini emgwaqweni oqhamuka eSiphingo obheke ngakwa E,F&G, isidumbu sakhe siseduze kwayo.
Akekho obekhuluma lomunye kulamalunga omndeni, bonke bebegobodisile bebheke isidumbu sakhe.
Kulezi zihlobo akekho ovume ukukhuluma labezindaba, zithe kuningi okushayisanayo abezwa kuthiwa kwenzekile, okwamanje kazikazi ukuthi kwenzekeni.
Akekho kuzo obefuna ukuzitsho ukuthi ungubani.
“Inhliziyo zibuhlungu, ngeke sikhulume okwamanje ,” etsho ehamba.
Okhulumela amapholisa kulesi sifundazwe, uLt Col Thulani Zwane, ukuqinisekisile okwenzekile wathi indoda yangaphandle kwaleli okuthiwa ibidakiwe, izidubule ngesibhamu sayo yafela emgaqweni.
“Kuvulwe idokodo mayelana nokufa kwendoda esiteshini samapholisa eMlaza. Ngesikhathi edubula akekho olimele,” kutsho uZwane. — Ubulembu
