uMthunywa
Cornelius Luphahla
KULENDODA engumphurofethi elokitshini le Cowdray Park koBulawayo etshiye izakhamizi zakulelilokitshi zingelankani ngemva kokuba iwiswe libhayisikili qede yathi itshayiswe ngumkayo ngondofa.
Isiga lesi senzakale kuviki ephelileyo lapho uMnumzana Denzel Nyoni owiswe khona libhayisikili wabangwa lezibi okudale ukuthi athi utshaywe ngondofa bomkakhe abehlukanayo uNkosazana Sabelo Ndlovu.
Kuzwakale ukuthi uMnu Nyoni wehlukana lomkakhe uMaNkomo kumnyaka ophelileyo sebelabantwana abathathu wasethatha uNkosazana Judith Dube okuyikho okwadala impi phakathi kwababili laba.
UMthunywa ukhulumisane loMnumzana George Moyo ongumakhelwane kaMnu Nyoni wathi okummangalisayo yikuthi uNyoni wawiswa libhayisikili engagijimi kodwa waqaleka.
“Mina okungimangalayo yikuthi uNyoni wawiswa libhayisikili engagijimi njalo kazange waphuma igazi kodwa wahle waqaleka khonapho. Kuthe kunjalo samthwalela endlini yakhe wafika waphaphama wathi kalimalanga ndawo.
“Ngemva kwalokho wasuka wayachitha okuyikho owafika wachema igazi elinengi kakhulu waqaleka okwesibili.
Samthwalela esibhedlela seMpilo kodwa sathi sesifika waphaphama wathi uphuphe unina esithi engangeni esibhedlela ngoba uzafela khona sasesiphenduka laye,’’ kulandisa uMnu Moyo.
Ekhuluma loMthunywa uNkosazana Lindiwe Phiri oyisihlobo sikaNyoni uthe bahambise uNyoni kumphurofethi wathi utshaywe zingilosi zakhe ngakho kumele abuyelelane lomkakhe omdala.
“Kuthe ngemva kokuba uNyoni eyale ukungena esibhedlela samusa komunye umphurofethi wafika wathi utshaywe zingilosi zakhe ngoba waphambanisa ngokwehlukana lomkakhe omdala. Ubuye wathi kufanele abuyelelane lomkakhe omdala ngoba engaqhubeka lalo olaye uzakufa masinya.
“Lokhu kungidanisile kodwa noma kunjalo uNyoni ulokhu ehlala lomkakhe omncane uyala ukubuyelelana lomdala uthi kakho muhle,’’ kutsho uNkszn Phiri.
Ebuzwa ngale indaba uMnu Nyoni uvumile ukuthi yenzakele wathi kodwa ucabangela ukuthi watshayiswa ngumkakhe ngondofa ngoba behlukana.
“Kuliqiniso ukuthi ngiwiswe libhayisikili ngaqaleka kodwa okungidanisayo yikuthi bengingagijimi. Ngalokhu ngicabangela ukuthi ngihlungwe ngumkami ngokungithumela ondofa. Ngitsho ngoba vele siyalwa lomkami lokhe sehlukanayo.
“Noma nje umphurofethi ongisizileyo ethe ngitshaywe zingilosi zami zifuna ngibuyelelane lomkami kodwa mina ngeke ngibuyelelane laye kungcono ngife,’’ kuveza uMnu Nyoni.
UNkzn Ndlovu ebuzwa ngale indaba uthe yena kalandofa njalo kuyamethusa ukuthi kungani uNyoni emgcona kangaka njalo ufuna ukumbophisa.
‘Mina kangilandofa njalo ngiyadana ukuthi kungani uNyoni engigcona kangaka ngento engingayaziyo. Lokhu kungizwisa ubuhlungu kakhulu sengize ngifisa lokumbophisa ngoba lamhla elimala ngangingekho njalo ngacina ukukhuluma laye kumnyaka ophelileyo.
“Ukhuluma njalo kasizi ngalutho abantwana imali yonke uyipha umkakhe lo olaye akhohlwe ukuthi ulabantwana,’’ kuphetha uNkszn Ndlovu.
