uMthunywa
KULENDODA yesiqintini seMatova eMasvingo ebulele umfanyana oleminyaka eyisificamunwe munye andubana ipheke ikhanda leli ilungiselela ukulidla.
Umetheswacala uClever Chitiga oleminyaka engu-22 ohlala ngaphansi kwenduna uZimuto kubikwa njalo ugxamuze ikhanda lomfana lo emanzini abilayo ngenhloso yokuliyobula andubana alifake phakathi kwengiga aligige ukuze libe zincezu ezincinyane.
Kumbiko weZimbabwe Republic Police ofakwe kunkundla yeTwitter kubikwa uChitiga wasebenzisa ingqamu yemkulwini ukuquma ikhanda andubana athathe umzimba awugoqele ngomambule ayewuphosela edamu.
Amapholisa aveze ukuthi umetheswacala usezandleni zabo njalo uphathisa amapholisa ngokuchwayisisa.
Kusitatimende lesi amapholisa aphinde njalo axwayisa uzulu ukuthi axekane lokulandela imikhuba engaqondanga ngenhloso yokudinga inotho.
“I-ZRP iyakuqinisekisa ukubulawa ngesihluku komfana oleminyaka eyisitshiyagalolunye esiqintini seMatova ngaphansi kwenduna uZimuto, eMasvingo mhlaka 4 Mpalakazi ngumetheswacala uClever Chitiga (22) ngenhloso yokwenza isiko.
“Umntwana lo waqunywa ikhanda ngengqamu yemkulwini ngaphambi kokuba ikhanda layo ligundwe ngamanzi atshisayo laselifakwa engigeni lagigwa ngomgigo.
“Ikhanda leli laxhwathiswa embizeni kulungiselelwa idili kukanti isidumbu sagoqelwa ngomambule andubana sicwiliswe edamu eliseduzane.
“Amalunga omphakathi ayaxwayiswa ngezinkolelo ezingelasisekelo zokuthola inotho; njalo bonke abenza lokhu bazabotshwa.”
