uMthunywa
YiNtatheli kaMthunywa
KULENDODA yesigabeni seMangaba eMberengwa okubikwa isithwalele omama ubhulo ngokubalunguza nxa begeza duzane kwesifula.
Indaba le isilesikhathi isenzakala ngoba omama laba abalazambuzi kumbe izindlu zokugezela, nxa besiyageza duze kwesifula bahamba bengomama bodwa ikanti kulenye indoda etshona ibahlalela ilunguza ukuba bagqoke izikhindi ezinjani.
Ekhuluma loMthunywa omunye wabomama abahlala kulesisigaba uNkosazana Siphetheni Mhlanga uveze ukuba bathwele nzima ngobaba lo. “Asilazambuzi, asilazindawo zokugezela, sigezela egangeni.
Nxa sihamba sihamba singomama sibanengi sisiyageza, ubaba lowu uyakhwela entabeni asilunguze abone bonke ubunqunu bethu.
Angasibona uhamba exoxa ukuthi uNakaZibani ugqoka iphenti elinje lomzimba wakhe ume kanje.
Sizizwa singavikelekanga ngitsho njalo siyesaba ngalokhu angacina esenza khona.
Lokhu akusithokozisi njengomama sidinga ukuthi sincediswe,” kutsho uNkszn Mhlanga.
Omunye umama okhulume lephephandaba likazulu uNkosazana Marian Ndlovu uveze ukuba ubaba lo uyabahlukumeza.
“Pho sigezele ngaphi? Asilazambuzi, asilandawo zokugezela, lapho esihamba sisiyagezela khona kusithekile kodwa omunye ubaba wesigaba ngokungasihloniphi uyagada entabeni asilunguze abone izihlalo zethu, lokhu kuyasehlisa isithunzi.
“Sesizamile ukubika emapholiseni udaba lolu kodwa asikatholi impumela yakhona,.
Ukungahloniphi kwalubaba kuyesabeka asazi lokuthi kuyini okungenziwa ukuze abotshwe ngoba lokhu akwenzayo akukho emthethweni.
Njengabomama kuyadingeka ukuthi sihlale sivikelekile njalo sisazi ukuthi siyahlonitshwa kodwa lokhu hayi kuyasehlula,” kuphetha uNkszn Ndlovu.
