uMthunywa
Johas Moyo
IZAKHAMIZI zeLuveve edolobheni lakoBulawayo zilokhe zibambe owangaphansi kulandela isiga sendoda efe ngemva kokunatha “ithathankawu”.
Umuyi uAgrippa Sibanda obehlala ku1193 eOld Luveve ubhubhe ngeviki ephelileyo kulandela ukunatha utshwala lobu obuvela eZambia.
Kubikwa umuyi ufe ngemva kokopha ngamakhala kanye langomlomo okwenza izakhamizi zicabangele ukuthi angabe wadabuka amaphaphu kanye lesibindi.
Abangane bakamuyi babikele uMthunywa ukuthi umuyi ubengaguli njalo bake baqhuba umsebenzi wabo wansukuzonke wezandla.
Omunye umngane kamuyi okhulume loMthunywa kodwa ongathandanga ukuqanjwa uthe umuyi engabe wabulawa yikunatha utshwala engadlanga kumbe engabe wafakelwa ekudleni.
“Umuyi sehlukana laye esesiyanatha emini kodwa mhlalokho sasingadlanga.
“Ngicabangela ukuthi mhlawumbe wabulawa yikunatha ithathankawu engadlanga,” kuchaza umngane lo.
Esinye isakhamuzi esingumngane kamuyi esambona engakabhubhi kodwa esephandlwe nguMaGwebu uMnumzana Dowen Mapfumo ubikele intatheli ukuthi ulesiqiniseko sokuthi umngane wakhe wadutshulwa isibindi butshwala abunatha engadlanga ngoba udla ngakwakhe.
“Ubeqeda isikhathi esinengi lapha kimi njalo esidla khonapha kodwa kangisiboni isizatho sokuthi abantu bacabangele ukuthi wafakelwa ngoba ngokumazi kwami umuyi ubethanda ukunatha utshwala obutshisayo bungathundubezwanga amandla okungabe kuyikho okumbuleleyo.
“Wafika kimi edakiwe njengenhlalayenza ngamhambisa ngakibo, kodwa okwesikhathi esincane wayesephendukile endlini yami njalo wafika wazigidela okutshengisa ukuthi wayeziphilele.
“Ngemva kwalokho wasuka ilanga lingakatshoni kodwa isimanga yikuthi ngabuya ngazobikelwa ukuthi usesehluleka njalo uphuma igazi emlonyeni lasemakhaleni okuyikho okwabangela ukuthi afe,” kutsho uMnu Mapfumo.
UMthunywa wenelise ukuxhumana njalo lomnewabo kamuyi uMnumzana Simon Sibanda okunguye obehlala laye obike ukuthi ubengaguli umuyi kodwa wayesuke nje engadlanga esiyanatha utshwala okuyikho okungabe kubangele ukufa kwakhe.
“Ubehlezi enatha njalo nje utshwala bakhe njalo ubethi engadakwa anunubale kodwa kangizange loba ngelanga elilodwa ngambona esiwa phansi ngokudakwa laloba enathe ithathankawu yakhe engayithundubezanga amandla,” kutsho uMnu Sibanda.
Ebuzwa ukuthi kungani umuyi ebesidla komakhelwane uthe kakwazi kodwa bekuyikuthanda kwakhe.
“Kungamanga ukuthi umuyi ubengaphathwanga kuhle lapha ekhaya, mina kangikwazi bengisithi nje uyazihambela komakhelwane ngoba kulabangane bakhe hatshi ngoba ehlutshwa.
“Thina njengemuli sibuhlungu njalo kasicabangeli sandla somuntu, umfowethu ubulewe nje butshwala ngoba bebumala yikho buze bamdabula isibindi,” kutsho uMnu Sibanda.
UMthunywa uxhumane lokhansila wendawo le uTamani Moyo yena obike ukuthi ukuzwile ukufa kukaSibanda njalo uthanda ukududuza imuli le.
“Ngithanda ukududuza imuli yakoSibanda ngokulahlekelwa ngiphinde njalo ngilimukise abantu abanathayo ukuthi baqaphele indlela abanatha ngayo ngoba utshwala buyabulala.
