uMthunywa
Thokozile Mbedzi
KULENDODA eleminyaka engu-52 yokuzalwa yesiqintini se-Ingezi C eMpalawani, eZvishavane ebotshwe kulandela ukutholakala ilime izihlahla zembanje ezingu-114 esivandeni sayo.
UChamas Nyoni (52) ubotshwe kuviki ephelileyo kulandela ukuba amapholisa ethole umbiko wokuba ulima imbanje esivandeni sakhe.
Kubikwa amapholisa esethole umbiko lo ahamba ayahlola athola ukuba ulezihlahla ezingu-114 ezilobude obuphakathi kwe-40cm kusiya ku-1,2 metres kunye le-600 grams yezomileyo.
Kubikwa uNyoni ubethengisela uzulu imbanje lezi.
UInspector Emmanuel Mahoko oyisikhulumi samapholisa esabelweni seMidlands uthe babophe indoda ebilima imbanje esivandeni sayo ngemva kokuncwetshwa indlebe nguzulu.
“Amapholisa ancwetshwa indlebe ukuba uNyoni ulima imbanje esivandeni sakhe aphinde azithengisele uzulu.
“Sesamukele umbiko lo, amapholisa ohlangothi lwabacuphi bahamba bayahlola emzini wakhe lakanye bathola imbanje zilinyiwe esivandeni sakhe.
“Amapholisa aqhubeka ehlola endlini yakhe athola elezinye ezingaba yi-600g zifakwe kuma-plastic zifihlwe ngaphansi kwamasaka omumbu,” kutsho uInsp Mahoko.
“Amapholisa athanda ukubonga uzulu ngokuqhubeka ephathisa ngokusipha imbiko ephathisa ukuthi izephula mthetho zifinyelelwe kuphungulwe inani lamacala.
“Uzulu uxwayiswa ukuthi atshiyane lomkhuba wokusebenzisa izidakamizwa ngoba ziyingozi kumpilakahle yakhe,” kuphetha uInsp Mahoko.
