uMthunywa
YiNtatheli kaMthunywa
KULEMULI yesigabeni seGoromonzi esifulathele umuzi wayo ngenxa yempicabadala eyenzakalayo nanko phela itshaywa ngengcekeza yabantu kanye lamatshe.
Imuli ephakathi kwensindabaphenduli le ngekaElijah Thandiwe Chirwa (83) lonkosikazi wakhe uElizabeth Banda (67) abahlala ngaphansi kukaSobhuku uDehwematuri.
Ngaphandle kokutshaywa ngengcekeza yangaphandle emanzi, imuli yakoChirwa kubikwa impahla yayo iyaphoselwa phandle yizinto ezingabonakaliyo kanye lokuxotshaniswa.
Okubangela lokhu akukaziwa.
Uhlupho lokutshaywa ngengcekeza yabantu luqale ngenyanga kaNhlolanja kuwonalo umnyaka.
Isikhulumi samapholisa esabelweni seMashonaland East, uInspector Tendai Mwanza uthe indaba le isifikile ehofisini yakhe.
“UGogo uBanda wafika emapholiseni akoJuru esithi batshaywa yingcekeza yabantu lamatshe okuvela emoyeni. Uthi sebehlala egangeni ngenxa yohlupho lolu.
“Lolu luhlupho lwesintu, kungakho thina njengamapholisa asikwazi ukuthi bacina besiyangaphi ukuyadinga uncedo,” utsho njalo.
Elandisela intatheli uKhulu uChirwa uthe ingcekeza le “inetha” ivela emoyeni isiyanamathela emdulwini phakathi laphandle kwendlu, enye njalo iwela phezulu kwezimbiza lemiganu okulokudla.
“Lenze kuhle labuya, lapha siphoselwa ingcekeza yabantu emanzi enye ilempethu. Kodwa oyiphosayo kasimboni, sibona nje ukuthi ivela emoyeni. Amatshe ayanetha evela phezulu, impahla efana lenkonxa loba igcwele amanzi iyaphakanyiswa iphoselwe le,” utshonjalo.
Imiganu lezimbiza lenye impahla kubikwa kuyasuswa ekhabothini kubuthelelwe phandle.
Kunsuku ezimbalwa ezedluleyo, umzukulu oleminyaka elitshumi uthi wabona ihloka likhitshwa umphini laselimlandela ‘liphapha’ njengenyoni lifuna ukumgamula.
“Sabaleka lapha saya kubomakhelwane lapho esaqala ukutshaywa ngamatshe lengcekeza. Umzukulu oleminyaka elitshumi yokuzalwa laye wayegijinyiswa lihloka liphapha njengenyoni kungathi lifuna ukumgamula.
“Kakho owenelisa ukusiza umntwana lo ngoba sonke sasisesaba, lamxotshanisa okwamamitha angu-50 laze lawela phansi.
UKhulu uChirwa uthe iwayilesi yabo yasuswa endlini yabo yokulala emini libalele yayaphoselwa phambi kwabo yinto abangazange bayibone.
Intatheli zizibonele ezinye izinto ezabulawa yizinto lezi kodwa ngesikhathi zikhona amasalamusi la kazange abonakale.
Ngesikhathi intatheli zifika uKhulu ubeyedwa unkosikazi ebalekele amasalamusi la.
“Ngake ngabaleka ngaya eNorton ngatshiya unkosikazi labazukulu lapha, kodwa kukhanya ngesikhathi ngingekho izinto lezi zasezihlupha kakhulu baze babaleka. Yikho lapho engaphenduka khona kungasahlaleki,” utsho njalo.
UKhulu uChirwa uthe wake watshaywa lilitshe walimala esandleni.
“Kwezinye insuku sivuka silele phansi sehliswe embhedeni. Asazi ukuthi kuyini kodwa lapho esesike sayabuzisisa khona kuthiwa sithunyelwa izinto ngomakhelwane bethu.
“Mina kangilamuthi omubi engake ngawubamba. Kithi kuseZambia kodwa ubaba lomama babhubhela lapha.
Kubikwa kwake kwabizwa abaphurofethi kanye lezinyanga ukuthi bazogezisa umuzi kodwa udubo lolu aluzange luphele.
Esinye isakhamuzi sendaweni le, uMirian Nyamadzawo uthe babona amalunga emuli le ebaleka betshaywa yingcekeza, imiganu kanye lamatshe kodwa bengaboni muntu.
“Akuhlaleki lapha, batshaywa yingcekeza yabantu enukayo eyabe ilempethu eziphilayo. Imbiza lemiganu kubatshaya kuvela emoyeni,” utshonjalo.
UNkosikazi Maria Makarani uthe imuli yakoChirwa yake yabalekela emzini wakhe ngenxa yezimanga lezi.
UJane Muchaya ongomunye umakhelwane uthe wafika emzini lo wathola kuphakululwa isitshwala lenyama kodwa kuphoselwa phandle.
“Safika lapha abantu sebefuna ukudla sababona beme phandle, isitshwala lenyama kwakuphakululwa kuphoselwa phandle enhlabathini. Okunye kwakuhlanganiswa lengcekeza yabantu,” utsho njalo.
Omunye usiyazi, uTichakunda Bote uthe kungenzakala ukuthi imuli le yabamba umuthi wemali kumbe njalo bakhona ababasebenzisayo.
