uMthunywa
Blessing Moyo
UGATSHA olubona ngezoMhlabathi, Ezokulima, Amanzi lokuthuthukiswa kwemaphandleni lukhuthaza abalimi ukuthi bafuye imvundla ngoba iphangisa ukuba minengi.
Kumbiko okhitshwe lugatsha lolu olubona ngezokulima, kubikwa imvundla imitha okwensuku ezingamatshumi amabili lasifica minwe mibili kusiya kumatshumi amathathu lane(28 – 34).
“Ngeviki yesine umvundla umithi umfuyi kumele abe eselungise indawo lapho azagcina khona imidlwane ngebhokisi elikhamise phezulu leceleni. Kumele libe lesivalo esingaba yi-10cm ukuya phezulu afika ukuze imvundla ingaphumi.”
Umvundla udinga ukulungiselwa lapho ozanyelezela khona ngakho kuqakathekile ukuba umfuyi afake utshani obomileyo phansi abeselungisa lebhokisi lapho umvundla ozanyelezela khona.
“Umvundla uyazilungisela wona indawo lapho ozanyelezela khona ngotshani obuyabe bufakwe ngumfuyi, nxa usulungisile umfuyi kumele athathe ibhokisi alifake lapho umvundla obukade ulungise khona.
Okuqakathekileyo yikuthi nxa umvundla usunyelezile ufuna ukubamba imidlwane qala uhuqe izandla zakho ngomquba kanye lomchemo kanina,” kutsho isitatimende lesi sogatsha lwezokulima.
Kubikwa umvundla munye ulakho ukunyeleza imidlwane emithathu kusiya kwelitshumi lanhlanu ngesikhathi sinye okutsho ukuba umlimi kuyabe sekudingeka ukuthi abone ukuba uyanika unina ukudla okunengi ukuze wenelise ukwehlisa imidlwane ithole uchago olweneleyo.
“Kuqakathekile ukuthi umfuyi anike umvundla wakhe ukudla nxa usunyelezile njalo abone ukuthi uyamunyisa imidlwane zikhathi zonke. ukuze ingabulawa yindlala.”
