uMthunywa
Langelihle Moyo
ABATHENGISA imithi yezifuyo abeFarm and City baxwayise abalimi ngendlela zokunakekela imidlwane yengulube, ukuze nxa sezihanjiswe emkambo zibaphe inzuzo ephezulu.
UMnumzana Itai Shambambeva oyi-Veterinary Consultant osebenza esitolo lesi uthe abafuye ingulube kufanele bebone ukuthi lapho okuhlala imidlwane kuhlanzekile ukuze ingabi lemikhuhlane engabangela ukuthi ife njalo izinga lokutshisa komkhathi kufanele libe phakathi laphakathi.
“Okwakuqala nxa imidlwane isanda kuzalwa kufanele ofuye ingulube abone ukuthi indawo lapho ehlala khona ihlanzekile ukuvikela imikhuhlane engabangela ukuthi ife, njalo nxa imidlwane isanda kuzalwa kufanele abalimi bezifuyo babone ukuthi ihlala lapha okungaqandi kakhulu njalo kungatshisi kakhulu.
“Ukuvikela umqando kufanele imidlwane le ingafakwa lapho okuligceke khona njalo badinge utshani babufake phansi esibayeni ukuze kukhudumale,” kuchasisa uMnu Shambambeva.
Uveze ukuthi nxa imidlwane esilensuku ezintathu izelwe iyahlatshwa ijekiseni ye-iron ivikelwa engozini yokubanjwa yimikhuhlane.
“Nxa imidlwane isilensuku ezintathu izelwe iyahlatshwa ijekiseni ye-iron evikela izibungwana (worms) esiswini ezingaletha imikhuhlane engayibulala. Imidlwane iyanikwa ukudla okubizwa ngokuthi yi-blood meal. Umlimi uyabe ehlanganise igazi lenkomo elomileyo lokudla kwengulube. Ukudla lokhu kuyayiqinisa umzimba yemidlwane le.
“Besokusithi ngemva kwenyanga eyodwa imidlwane iyakhutshwa ebeleni, lokhu kwenziwa ngokuzehlukanisa labonina. Beseliyinika i-pig grower le-pig finisher, lapha liyabe selizikhulisa njalo selizilungiselela ukuyazithengisa,” kutsho uMnu Shambambeva.
Uthe uhlupho abalimi abangahlangana lalo nxa ingulube zisanda ukunyeleza yikuthi omunye umhlobo wengulube uyadla imidlwane yayo.
“Uhlupho abalimi abajwayele ukuhlangana lalo yikuthi eminye imihlobo yengulube iyadla imidlwane yayo isanda kuzalwa. Ngakho-ke abalimi abangakwenza ukuvikela lokhu yikwehlukanisa imidlwane le labonina kodwa isisenelisa ukumunya.
“Lokhu umlimi angakwenza ngokwakha izibaya lapho angenelisa ukuthi imunye kodwa yehlukaniswe labonina,” kuphetha uMnu Shambambeva.
