uMthunywa
Khanyile Ndebele
INHLANGANISO yeAgritex isixwayise abalimi ngendlela yokulima ama-cucumber elakho ukubenza bazitshayele imali enhle.
UNkosazana Treggy Mpofu ongumlimisi wakoBulawayo uthe abalimi abalesifiso sokulima ama-cucumber balakho ukuzitshayela inala nxa bangalandela izixwayiso zabo.
Uthe kuhekitha umlimi udinga nje i-2,5kg loba i-3,75kg yenhlanyelo.
“Umlimi kufanele ananzelele indawo lapho afisa ukuhlanyela khona isilimo sakhe ukuze isilimo sakhe senelise ukwenza kuhle.
“Nxa ama-cucumber ehlanyelwa kumele imifolo itshiyelane isibanga se-1,2 kusiya ku-1,8 cm kukanti phakathi laphakathi komfolo kumele kube yi-0,6 kusiya ku-1,2cm,” kutsho uNkszn Mpofu.
Uthe nxa kuhlanyelwa ku-Greenhouse kufanele umfolo kufanele yehlukaniswe nge 0,3 kusiya ku-0,45cm besekusithi phakathi laphakathi komfolo kube yi-1,2 kusiya ku- 1,5cm.
Uveze ukuthi ohlanyela emasimini usengasebenzisa indlela ebizwa ngokuthi yi-farrow elomfolo owodwa ngoba lokhu kwenza kubelula ukunakekela isilimo lesi lokusithelela.
Uthinte njalo ukuthi ukuthelela kubalulekile kakhulu nxa ama-cucumber esehlanyeliwe.
Uthe isilimo esilinywe emasimini singathelelwa ngokusebenzisa i-drip irrigation system.
“Okunye okubalulekileyo yikuthi isilimo lesi kumele sibotshelwe izihlahla zaso ezigodweni ukuze singaze sathinta phansi. Lokhu kuyavikela njalo ukuthi isilimo singaze sabanjwa yimikhuhlane.
Uthe ukuze isilimo lesi senze kuhle umlimi kumele akhuthalele njalo ukusifaka umquba kungaba ngowamabhiza, owenkomo kunye lowembuzi.
“Ukuze kube lesivuno esikhulu kufanele umlimi akhuthalela ukufaka umquba kabili phambi kokuba sizale izithelo,” kuchaza uNkszn Mpofu.
UNkszn Mpofu uxwayise ukuthi imikhuhlane enjenge-Fisari wilt, Antharacnose, Powdery mildew kanye le-cucumber mosaic ehlasela ama-cucumber ingelatshwa ngemithi yezibungu kumbe ukuhlanyela izilimo ezehlukeneyo ndawo yinye okunjengamahanyanisi ngoba ayabulala izibungu.
