uMthunywa
Blessing Moyo
INHLANGANISO ebona ngezokulima eye-Agritex isixwayise abalimi ukuba bangavuna amathanga kumele bawaphathe kuhle ukuze engonakali ngoba eyisilimo esidinga ukuhlala sikhangelwa.
UNkosazana Gota Taruda ongumlimisi esigabeni seMangwe ubike ukuthi abalimi abanengi kabalalo ulwazi lokunakekela amathanga ngemva kokuwavuna.
“Abalimi kundawana zonke jikelele abalalo ulwazi lokunakekela kanye lokuphatha amathanga ngemva kokuvunwa. Umlimi kumele amathanga akhe athi angavuthwa awakhiphe emasimini ayewafaka esiphaleni kumbe lapho agcina khona isivuno sakhe.
“Ngokwenza lokhu umlimi uyabe esewavikele elangeni kanye lakumazolo alakho ukuphambanisa amathanga esevuthiwe.
“Okunye njalo akumelanga umlimi atshiye amathanga okwesikhathi eside esevuthiwe emasimini ngoba kungenzeka izulu line acine ebola,” kuchasisa uNkszn Taruda.
Ithanga
Uqhubeke echaza ukuba amathanga alakho ukuhlala inyanga ezine engonakalanga nxa egcinwe kuhle.
“Amathanga awafuni ukuhlala endaweni etshisayo kakhulu futhi akumelanga ahlale elekene lapho umlimi ayabe ewafake khona ngoba lokhu kudala ukuthi acine ebola,” nguNkszn Taruda lowo.
Uphethe ngokuthi umlimi akumelanga ahlalele izandla esithi useqedile ukulima wavuna.
“Kuqakathekile ukuba umlimi angahlaleli izandla kumele ahlale ephendula amathanga akhe nxa esewavunile.
“Okunye njalo kumele abone ukuthi indawo lapho okulamathanga akhe kuyangena umoya njalo abone ukuthi awaminyananga,” kuphetha uNkszn Taruda.
