uMthunywa
Nkosilathi Sibanda
UMQEQETSHI weHighlanders uErol ‘‘Mkabayi’’ Akbay uyaqabuka ukungena enkundleni yeNational Sports Stadium lokhe waqala ukukhuza uMantengwane njalo usebike ukuba ngeke kwenzeke ukuthi iqembu lakhe linqotshwe yiDynamos yena ekhona.
Amaqembu la womabili aziwa eyizitha kunguqu yakuleli adibana kumdlalo weligi yeCastle enkundleni yeNational Sports Stadium ngoMgqibelo emini lapho okukhangelelwe ukuthi iDynamos itshone.
Ukudliwa kweDynamos kulumdlalo kusengqondweni kaAkbay obona angathi iHighlanders iqine ngcono kulesitha sayo sakudala.
IBosso yethekelela iDeMbare ihleli khatshana leDynamos kulogu. ITshilamoya indiza kunombolo yesibili kuthi iDeMbare idonsa ngomnxeba emsamo.
Ekhuluma loMthunywa phakathi kweviki, ngesikhathi elolonga abadlali bakhe, uAkbay ubhejile ukuthi abafana bakhe ngeke badliwe yiDeMbare kulesisigaba seligi.
“Sizawubamba umdlalo ngazo zombili. IDynamos angiyazi kangako njalo layo ayiwazi umdlalo wami. Lokho kunginikeza igunya,” kutsho uAkbay.
UAkbay uyibophe yaqina ithimu yakhe njalo ukholwa ukuthi bazanqoba. NgoLwesibili uqhubeke ngokulolonga abafana ukuze balungele umdlalo wabo. Ithimu itshone igijima kwenye indawo ecatshileyo lapho okulohlelo lwe-bootcamp olokuqinisa umzimba.
Iloba uAkbay ubekhala ngokuthi abanye abadlali kabaqinanga, ulesiqiniseko sokuthi iDynamos izatshaywa.
Umqeqetshi lo kayiqhuqhi ngitsho iDeMbare njalo ukunqotshwa yiyo kumasizini adluleyo kakubali.
“Sizayibhuqa iDynamos. Kubuhlungu ukuthi iHighlanders ibelembali yokwehluleka ukunqoba ithimu eyodwa kuminyaka edluleyo kodwa kulumdlalo, ngokulolonga esikwenzayo, angiboni ukuthi singanqotshwa.
“Siphakathi kwamalungiselelo omdlalo lo loba kulabafana bami ababili abalimeleyo. Ngilethemba lokuthi abafana laba bazabe sebengcono ngempelaviki ngesikhathi somdlalo,” kutsho uAkbay.
IDynamos ingena enkundleni imisila iphansi. Ithimu le ayikaze inqotshwe ngalindlela kulesisigaba seligi kumasizini adluleyo.
Lokho kungabe kuyikho okuletha ukuzethemba kubadlali beBosso ngoba iDynamos ayikaze ifike kulesisigaba ilapho ekhona engalaneni.
Omunye umlandeli weqembu leBosso uNdumiso Ncube ubikele uMthunywa ukuthi uAkbay kuzamele enze okungcono kumdlalo lo.
“Kuyasikhathaza ukuthi sokuleminyaka eminengi silokhe sisehlulwa liqembu elilodwa. I-Caps United layo yayihlala isehlulwa liqembu leli kodwa yasukumela phezulu yenza okungcono kungakho leBosso kuzamele isebenze nzima ukuze iphume kusithuko sokudliwa,” kutsho umlandeli lo.
Imidlalo yeligi yeCastle ekhona kulimpelaviki:
Lamuhla: How Mine v FC Platinum (Luveve).
NgoLwesihlanu: Harare City v Chapungu (Rufaro).
NgoMgqibelo: Dynamos v Highlanders (National Sports Stadium).
Impumela yeviki eledluleyo: Caps United FC 2, ZPC Kariba FC 2; FC Platinum 3, Border Strikers FC 0, Chapungu FC, Ngezi Platinum Stars 1; Chapungu 1;Tsholotsho FC 0, Dynamos FC 1; Mutare City Rovers 1, Chicken Inn 3; Highlanders1 Harare City 1; Triangle United1, Bulawayo City 1; Hwange 2, How Mine 0.
