uMthunywa
Khanyile Ndebele
INHLANGANISO yeAgritex isilimukise abalimi ngendlela okufanele basenge ngayo inkomo nxa befisa ukulungisa amasi azenza babe lenzuzo ephezulu.
UMnumzana Addmore Chikohwa onguPrincipal Officer weLivestock Production kunhlanganiso ye-Agritex uthe okwakuqala okufanele abalimi bakwazi yikuthi kusengwa inkomo ziphi njalo nini.
“Okwakuqala umlimi kufanele abekwazi ukuthi kusengwa inkomo ezilamathole. Kufanele asenge inkomo le kanye ngelanga nxa isehlisa kakhulu kuthi nxa ingehlisi kakhulu umlimi kufanele ayisenge kabili loba kathathu ngeviki ukuze ithole lingasweli uchago,” kutsho uMnu Chikohwa.
Uqhubekele phambili esithi umlimi kufanele njalo abone ukuba impahla asengela kuyo uqala ayihlanze engakayisebenzisi.
“Nxa inkomo isengwa kumele kufakwe ukudla phambi kwayo ukuze ithi nxa isengwa ibe isidla. Kubalulekile njalo ukuthi nxa isengwa inkomo ibe ibotshiwe inyawo zemuva ukuze ingakhabi lo oyisengayo.
“Ngemva kokuyibopha andubana aqale ukuyisenga umlimi kumele abone ukuba uyagezisa imibele yenkomokazi aphinde ayomise ngethawulo ehlanzekileyo. Nxa engenza lokhu kufanele ageze izandla zakhe azesule abesethatha umuthi wokusenga othambisayo uphinde welule imisipha awugcobe imibele yenkomo,” kutsho uMnu Chikohwa.
Uthe nxa umlimi wezifuyo sesenga kufanele abone ukuthi akungeni mpukane phakathi kwesiganu sakhe sochago.
“Nxa umlimi wezifuyo esesenga inkomo kufanele abone ukuthi akuweli impukane phakathi kwesiganu sakhe.
Umlimi angenza lokhu ngokufaka okuvimba impukane okungaba lilembu kumbe isivalo esivimba ukuthi zingene,” kutsho uMnu Chikohwa.
Uthe ngemva kokusenga inkomokazi kumele igcotshwe njalo umuthi wokuyivikela kuzifo.
Uphethe ngokuthi ngemva kokusenga inkomo kumele inikwe ukudla okunengi ukuze yenelisa ukwehlisa uchago lwamathole.
