uMthunywa
BEITBRIDGE
KULENDODA yesigabeni seMpande eBeitbridge esesimeni esibi kulandela ukuxhonxwa ngenye kuviki ephelileyo kubangwa utshwala.
UNorman okungasatholakalanga isibongo sakhe kubikwa waxhonxa uDanisa Mlilo ngengqamu emlenzeni kanye lesiswini kubangwa utshwala ebhawa.
Ekhuluma lentatheli kaMthunywa uJames Moyo uthe uNorman wayehamba eqala abantu ebhawa ngemva kwesikhatshana wasethatha utshwala bukaMlilo.
“UNorman ubehamba ethathela abantu utshwala babo kungakho uthe ezama ukwenza okufanayo uMlilo wala. UNorman wahle wavuka ngolaka wakhipha ingqamu wamgwaza emlenzeni lesiswini. Ngikhuluma nje uyagula sibili kodwa kayikho imali yokuthi aye esibhedlela,” kuchasisa uMnu Moyo.
Uqhubekele phambili esithi uNorman useluhlupho emphakathini.
Kubikwa indaba le yabikelwa amapholisa aseduzane lanxa isikhulumi samapholisa esabelweni seMatabeleland South uPhilisani Ndebele ethe usadingisisa ngodaba lolu.
