uMthunywa
PLUMTREE
KULEMULI yeMacingwane ePlumtree esele ithoba amanxeba ngemva kokuhlahlelwa ngebhemba ngomakorokoza yathathelwa iR30 000 kanye lempahla.
UMnumzana Stoki Mpofu uhlaselwe lemuli yakhe ngomakorokoza laba ngeviki ephelileyo.
Kubikwa bathi befika bagamula uMnu Mpofu ekhanda ngehloka ngapha besithi abaphe imali ayithole ekuthengiseni inkomo.
Induna yakule indawo uWasi uveze ukuba abantu laba sebekhathazile esigabeni sakhe.
Kubikwa uMnu Mpofu wayethengise inkomo ezintathu okuyikho okwenza omakorokoza laba bezwa udletshana lolu baze bamhlasela ebusuku befuna imali yonke ayelayo.
Induna iqhubekele phambili iveza ukuba abantu sebehlezi bethwele amaphaphu ngezandla.
“Abantu abasakhululekanga endaweni yami lapha, kungazwakala ukuthi ulokuyimadlana balala bekuhlasela ebusuku omakorokoza. Omunye wayevela thenga imota yakhe eMzansi bambamba laye bethwele amabhemba kuthiwa kalethe imali eseleyo ngesikhathi ethenga imota,” kuphetha iNduna uWasi.
