uMthunywa
Nkosilathi Sibanda
ABAQOQI bomcimbi weLuswingo Kalanga Cultural Festival babike ukuba lonyaka bazagxila ngokuvuselela amasiko, imikhuba lolimi lwesiKalanga.
ILuswingo Kalanga Cultural Festival le izaqhutshelwa koTokwana, esigabeni seBulilima ngoLwesihlanu. Izabe iqhutshwa okwesithupha.
Kubikwa kuzavuthiswa inkundla ngomculo. Kunxuswe abahlabeleli ababalisa iBlack Umfolosi, Bukalanga Express, Izingonyama Sounds (Ezokutabhayila), Tjinyebenyebe, Magalila Ngoti leJongo Tokwana Great Sounds.
Ummeli wesigaba seBulilima ePhalamende uDingumuzi Phuti uzabe ekhona.
UPhuti ngomunye osekele ukuqoqwa kwalumcimbi njalo kukhangelelwe ukuthi laye angene esitikini ajabulise uzulu, nanko phela ungumculi ozwayo.
Isikhulumi seLuswingo Kalanga Cultural Festival uDifa WaJapi Dube uthe sebelinde ilanga langoLwesihlanu.
“Konke sekulinde mhla welanga. Silokuthaba ekuthini senelise ukuphendukisa umcimbi wamasiko lo. Sinxusa wonke umuntu odabuka kwelakithi, sisithi wozani ngobunengi benu lizofunda lokukhankasela ukugcinwa lokusabalalisa amasiko esiKalanga.
“Bakhona abavela phetsheya labanye abaphuma endaweni ezitshiyeneyo eZimbabwe. Sikhangelele ukuthi kube labantu abanengi,” kutsho uDube kumbiko wakhe.
Uthe kumalanga asanda kwedlula, benze umcimbi omncane edolobheni lePlumtree lapho abakade bezama ukuthi baqogelele imali ezancedisa ukuqhuba iLuswingo Kalanga Cultural Festival.
