uMthunywa
Ethel Ncube
KULEMULI kaWadi 4 eNtabazinduna ephakathi kosizi ngemva kokubulawa kwelinye ilunga lemuli eligwazwe ngomkhonto lafa qede omunye usomabhizimusi athwale isidumbu alubhekise koBulawayo lapho impahla zesidumbu ezifike zanyamalala khona.
Insumansumane le yenzakale ngempelaviki lapho uMnumzana Fish Sibanda ehlatshwe ngomkhonto nguZwelinzima Kheswa wamtshiya ebangwa lezibi kubangwa ukuthi umuyi uthanda ukulamula angakwaziyo.
UMthunywa ubikelwe ukuthi uMnu Kheswa usezandleni zamapholisa. Ababikele iphephandaba likazulu baveze ukuthi usomabhizimusi wanqunula umuyi izigqoko wamtshiya emosha koBulawayo.
Intatheli ixhumane lomunye wezakhamizi zakule indawo uMnumzana James Moyo ochaze ukuthi kukhona owabulawayo ekunatheni
“Thina sezwa umsindo umuntu esebongolela sagijima sakhangela sathola igazi ligeleza njengomfula uTshangane.
Ngathi ngibuzisisa ukuthi pho uFish ugwazelweni bangibikela ukuthi bekulesikhwili lapha esokulamula. Umuyi lo ngendlela obekulandiswa ngayo kukhanya wake walamula omakorokoza laba yikho akufeleyo,” kubika uMnu Moyo
Uqhubekele phambili echaza ukuthi umkhonto wamgwaza kakubi yikho kwehlula ukuthi aphile
“Igazi laphuma kakhulu evele engasakhulumi ethule zwi kodwa ephila wagijinyiselwa eUnited Bulawayo Hospital ngokuswelakala kwenhlanhla kasafikanga waphelela endleleni. Asazi ukuthi uKheswa wayengenwe ngumoya bani aze acitshe umphefumulo khathesi kaziwa lapho akhona amapholisa ayamdinga.
UMnumzana Khawulani Mpofu usomabhizimusi owathwala umuyi esaphila emusa koBulawayo wenza lokhu engabikelanga abomdeni njalo kukhanya wakhulula lo osengumuyi impahla endleleni lalamuhla impahla lezi akwaziwa ukuthi wazisa ngaphi.
Kubikwa wathi emusa esibhedlela koBulawayo ngokuswelakala kwenhlanhla watshona endleleni. Abasiki bebunda bathi uMpofu wathi efika esibhedlela lomuyi wamtshiya wahle wanyamalala. Abomdeni babona amapholisa esethutsha ehamba laye uMpofu kodwa wehluleka ukuchaza ukuthi impahla zikamuyi wazisa ngaphi,” kutsho uMnu Moyo.
Ekhuluma lentatheli uMnumzana Velempini Ndlovu uchaze ukuthi indaba le iyabadida njengomdeni ngoba minengi imibuzo edinga impendulo kodwa kakho oyiphendulayo.
“Silokhe simadolonzima ngokubulawa kukaSibanda lokuthi ubulaweleni akucaci. Umsolwa lo kumele adingwe avalelwe ejele. Abazali bakamuyi balahlekelwe, abakamsolwa besadalala bedinga inyanga engabenzela ukuthi kuphelele emoyeni. Okuhluphayo yikuthi omunye usethule ukuthi kuphume iqiniso alisaphumi asisakwazi ukuthi sithi bebebangani sibisibili,” kutsho Ndlovu
Intatheli ikhulumisane lelinye ilunga lemuli eliziveze ngokuthi ngumaSibanda oveze ukuthi lokhe bebuhlungu ngesenzo lesi
“Sibuhlungu ngokulahlekelwa okungaka kodwa okusizwisa ubuhlungu kakhulu yikuthi izigqoko zikamuyi zaya ngaphi kukhona okutshaya amanzi lapha ngazo. uMnu Mpofu uyaxhamanda kazwakali ukuthi uthini ngazo,” kubika uNkosazana Sibanda.
Imizamo yokukhuluma lesikhulumi samapholisa eMatabeleland North uInspector Siphiwe Makonese ngoba kuthiwa kakho ehofisini lomakhalekhukwini wakhe ubengangeni.
