uMthunywa
Nkosilathi Sibanda
IQEMBU lezomculo eleMlambos Express Band, elaziwa ngokuthi nxa lingena enkundleni kuvungama uzulu, libika ukuba kulimpelaviki kuzaduma phansi kutshise phezulu kumcimbi walo omkhulu eHillbrow ngoMgqibelo.
Izizalwane zakuleli ezihlala eGoli, ezilandela iMlambos Express Band zizathi ukuthola ubunandi obuyisigaqa, zikhumbule ekhaya zisizwa umdumo we-rhumba owasungulwa kulumhlubulo welizwe.
Emcimbini lo, iBand for the People izabe incediswa nguNdux Junior enkundleni yeHillbrow Theatre.
Inhloso yalumcimbi yikuhlanganisa abalandeli bonke abaseGoli ukuze babongwe ngesipho sedlalade elithi Phila ka One.
Umaneja weqembu uThabani “Baba kaMusa” Ndlovu uxhumane lentatheli kaMthunywa ngoLwesithathu emini ebika ukuthi kulindwe ngabomvu ukuza kosuku lwangoMgqibelo.
“Njengoba sakubika phambilini ukuthi sizaphakulula isigaqa sedlalade, sekwenzakele. NgoMgqibelo siseHillbrow Theatre, kuzakhala isiginci kusabele uzulu,” kutsho uNdlovu.
“Lidlalade elikhulu kithi ngoba yiyo indlela esifuna ukubonga ngayo abalandeli bethu. Umnyaka usuphelile, ngakho sithi wozani lonke lizosixhasa, lathi silenzele okuhle.”
UNdlovu uthe ukwethulwa kwedlalade kuzakuba yingxenye yokukhulu okuzakuba khona eHillbrow Theatre.
“Sizabe siloNdux Junior lapho. Andubana umphakathi ubuthane ngoMgqibelo, sizabe silomunye umbuthano wama-VIP, abaxhasi bethu kwenye indawo efihlakeleyo. Kodwa sithi liyeza idlalade ngoMgqibelo emini.”
Kusenjalo, ngelanga elifanayo iMlambos Express Band izethula kuzulu uTrevor “Bigman” Bhebhe oseqhatshwe ukuba yingxenye yabomaneja benhlelo zayo.
uTrevor “Bigman” Bhebhe
IMlambos iveze ukuba uBigman nguye ozakhangela inhlelo zayo.
UBigman ungena esihlalweni ebesiphethwe nguNdlovu.
Echaza ngokuqhatshwa kukaBigman, uNdlovu uthe akula omunye umuntu ebengawuthola lumsebenzi.
“Buza loba ngubani kwezomculo, akula ongafuni ukuthi uTrevor Bigman Bhebhe abengumaneja wakhe.
“Ungene kulumsebenzi ethathela esihlalweni ebengikuso esika-general manager. Mina sengingu-executive manager.
“UNjomane, njengoba simbiza ngesitemo sakubo nguye ofaneleyo.
“Ulothando leqembu leMlambos Express Band njalo usencedise kakhulu kunhlelo zethu.
Sikhangelele ukuthi abeyinsimbi ezaqinisa iqembu esebenza ndawonye lomkhokheli wethu woqobo uFiselani ‘SaMaNgwe’ Ngwenya.”
