uMthunywa
Cornelius Luphahla
IQEMBU lodumo kwezomculo we-rhumba iMlambos Express Band eliseSouth Africa seliqalise umkhankaso wokuvakatshela abalandeli ngenhloso yokubajabulisa.
Leliqembu elicula liseSouth Africa seliveze ukuthi kulelikhefu lizimisele ukwenza imicimbi kuleli kanye lakwezinye indawo ukuze lijabulise uzulu ngengoma zalo.
Ekhuluma loMthunywa uThabani Ndlovu ongumqondisi waleliqembu uthe umkhankaso wabo lo bawuqalise kunyanga ephelileyo njalo basaqhubekela phambili.
“Umkhankaso lo siwuqalise ekupheleni kukaMbimbitho ngenhloso yokujabulisa uzulu. Sesivakatshele endaweni ezikweleSouth Africa ezigoqela iLimpopo, Hillbrow, Thekwini kanye lakwezinye indawo ezehlukeneyo.
“Ngekhefu lePhasika sizavakatshela kwelakithi eZimbabwe endaweni ezigoqela iGwanda lePlumtree siyedlala ingoma zethu. Khonale sizenza ama-shows. Lokhu sikwenza ngenjongo yokuvezela abalandeli bethu ukuthi sisabakhumbula endaweni ezehlukeneyo,’’ kutsho uNdlovu.
Umholi waleliqembu uFiselani Ngwenya ubikele intatheli ukuthi emikhankasweni yabo uzulu uzangena ngemali encinyane kakhulu kuma-shows ngoba bejonge ukujabulisa uzulu.
“Emkhankasweni wethu lo owokujabulisa uzulu singenisa abantu ngemali ephansi ngenhloso yokuthi bonke abafuna ukungena kuma-shows ethu bangehlulwa yikuswela imali.
“Okunye njalo sizaqhubekela phambili sivakatshela abalandeli bethu endaweni ezehlukeneyo kuze kuyefika uMpalakazi ukuze abalandeli bethu bonke babesazi, bangasizwa ngendaba,’’ kuphetha uNgwenya.
