uMthunywa
YiNtatheli kaMthunywa
LOBA sandise ukuzwa kuthiwa ukuhlanzeka kuseduze lobuNkulunkulu, omunye umphurofethi webandla leJohane Masowe Nyenyedzi Nomwe eyaziwa kakhulu ngokuthi yiNguwo Tsvuku, uthi waqeda iminyaka eyisikhombisa engagezi umzimba njengesifungo abalaso lomoya oyingcwele.
UMnumzana Justin “Madzibaba Aaron” Makuba (44), ovela esigabeni esingaphansi kwenduna uDzoro eZaka, eMasvingo, olebandla lakhe ngaphansi kwenduna uNematombo eHurungwe uthe waqeda iminyaka emine esendaweni “engaphansi lapho engangihlala lenjuzi”.
UMphurofethi lo uyabhema igwayi lamakhala aphinde enze konke okwenziwa zinyanga kanye lokukaNkulunkulu. UMadzibaba Aaron ulenduku ezimbili, enye yakhona inde okungaba ngamamitha amane.
“Ngangenwa ngumoya ongcwele ngisesemncane ngahle ngaqala ukulandela amagumbi amane ngaphinda ngaguqulwa indlela engiphila ngayo ngasengisiya emhlabeni wangaphansi lapho engahlala khona iminyaka engaba mine.
“Ngikhonale, ngangihlala lenjuzi labanye abantu ababekhuluma indimi zonke ezisemhlabeni.
“Sasisidla inhlanzi eziluhlaza, udaka, utshani obumnandi njenge-sugarcane, ilala lokunye okunengi. Khonale sasihlala singagqokanga, kungela olenhloni, kwakungakhathalekile ukuthi ungowesifazane loba ungowesilisa. Kodwa akulakuphinga loba ukuthathana,” utshonjalo uMadzibaba Aaron.
Uthe endaweni le akwakhiwa izindlu, futhi lelanga kaliphumi kodwa kuhlala kukhanya zikhathi zonke.
“Ngasuka ngayahlala elizweni elitsha, lapho ke ngake ngathatha ngatshiya unkosikazi labantwana abane. Lokhu kwabangela ukuthi unkosikazi wami asale ethathwa ngenye indoda, osekubangela ukuthi abantwabami badubeke.
“Sasihlala ebhalwini ngaze ngaphenduka khonale sengilendevu ezinde lenwele ezinde okuyisimo sabantu bonke abakhonale. Okumangalisayo yikuthi endaweni le, kuhlalwa lenyoka ezingalumi abantu, sasiphambana lazo zizolala lapho lathi esilala khona.”
UMadzibaba Aaron uthi endaweni le kulezithelo ezinengi ezidliwa ngabantu kunye lenyamazana zeganga.
“Konke nje okuhlala emanzini kuyadliwa njalo yikudla okuthandwa ngabantu abahlala endaweni le. Ekuphendukeni kwami, ngangingasaboni, ngaze ngajayela ngokuya kwesikhathi.
“Endaweni le akula kuthathana, loba ukukhombisana njalo abantu bakhonale kabagugi loba ukugula,” utsho njalo.
UMadzibaba Aaron uthe ekuphendukeni kwakhe wahlangana lomntwana angamaziyo owathi uthunywe ukuthi amgele inwele zakhe wavuma.
“Umntwana lo wangigela inwele konke lendevu wayakugebhela phansi engingazange ngikwazi ukuthi kutshoni. Yikho lapho engalaywa ukuthi kumele ngihlale iminyaka eyisikhombisa ngingagezi, ngihamba kumagumbi amane omhlaba ngisiyangena ebhalwini.
“Okumangalisayo yikuthi ngesikhathi lesi ngingagezi kangizange ngike ngibe lamaxolo engcekeza loba ukuthi nginuke ngoba ngangihlala ngingathi ngigezile nsukuzonke. Ngangicazimula,” utshonjalo.
Uthe ngemva kokuqeda isifungo lesi sokuthi angagezi, waphenduka ebandleni lakhe lenhlane eseqinile emoyeni okumenza abone okufihlakeleyo empilweni. Uthe wathatha unkosikazi wesibili kodwa laye wahamba njalo ngenxa yokuthi kahlali phansi ngokuhamba encedisa abantu.
“Unkosikazi wesibili ngaba labantwana ababili laye. Kangilaso isikhathi sokuhlala labo ngoba ngiyabe ngibhoda indawo zonke. Umlayo wokuthi ngingagezi sowedlula, khathesi sengigeza.
“Ibandla lethu lalikhokhelwa nguMutumwa Micho yena osewedlulayo emhlabeni kodwa siyabonga ngoba wasitshiyela amandla. Ibandla lethu liyahlanganisa okwamadlozi kunye lomoya oyingcwele. Sisebenzisa ibhayibhili lomdombo ngenxa yokuthi ngokubona kwethu, uNkulunkulu lamadlozi akukho lapho okwehlukana khona.”
Uthe uyenza okufunwa ngamadlozi lokufunwa ngumoya ongcwele sikhathi sinye.
“Uhlupho lwami yikuthi zonke indawo lapho engifika khona abantu bayagcwala njalo ngibasiza egcekeni okucina kubangela ukuthi abanye bangizonde okuyikho okwenza kwatshiswa lapho engangithandazela khona eMapinga leMakande.
“Kodwa ngenxa yamandla amadlozi kunye lakaNkulunkulu, kanginqobeki ngiya phambili ngokuncedisa abantu,” utshonjalo uMadzibaba Aaron.
