uMthunywa
MAVIKI onke ngezimnandi zodwa elizethulelwa ngelikazulu nanko phela lakule iviki sidibanisa abalandeli bephepha lomhlabeleli wokholo uNombeko Khahlela.
Nxa ufuna ukwazi kabanzi ngalumhlabeleli nansi ingxoxo phakathi kwentatheli kaMthunywa uArnold Ndlovu (AN) lentombi engumhlabeleli uNombeko Khahlela (NK).
AN: Ntombi akusithi fahla ngamafitshane mayelana ngawe langembali yakho kwezomculo.
NK: Mina ngokuzalwa nginguNombeko Khahlela intombi eyazalelwa eLupane esigabeni seMzola okulapho engakhulela khona ngafunda khona, ngileminyaka yokuzalwa engu-33.
Ngingumhlabeleli wokholo esengileminyaka ngaqala ukuhlabela, njalo ngakhetha ukungena ekuhlabeleni ngoba ngilesiphiwo esivela kuMdali njalo ngakhetha ukuhlabela ezokholo ukuze ngihlale ngimdumisa malanga onke.
AN: Njengomuntu othi useleminyaka wangena kwezomculo ungavezela abalandeli bephepha ukuthi sewakhipha amadlalade amangaki njalo usebenzisana labobani?
NK: Mina sengakhipha ingoma ezedlula itshumi kwasokusithi ngomnyaka ka2015 ngakhipha idlalade lami lakuqala engalibiza “Ukulalela”. Idlalade leli lilengoma ezingu-10. Kwasokusithi lonyaka ngakhipha idlalade lami lesibili ngenyanga kaNkwenkwezi engaliqamba ngalithi “Sembethamandla” elaba lengoma ezingu-8.
Abantu banengi engisebenzisana labo bagoqela abanye abahlabeleli ngoba bayanginxusa emicimbini yabo, abanye ngengingena labo e-studiyo njengakudlalade lami lesibili ngihlabele labahlabeleli abagoqela uFundani Ndebele kanye loEbenezer, kuphinde kube khona abantu abahlanganisa ama- instruments lawa engihlabela kuwo.
AN: Abantu bawamukela njani umculo wokholo, bayawuthakazelela yini?
NK: Abantu bayawuthanda umculo wokholo njalo uyamukelwa kakhulu ngitsho lentsha isikhona elandela umculo lo. Ngike ngaba le-interview emsakazweni weRadio Zimbabwe lapho abantu abatshayela incingo bejabula ngomculo wami, ngitsho lakuma-shows abantu bayawuthakazelela njalo bangikhuthaza ukuthi ngiqhubekele phambili.
AN: Kuhle nxa umculo lo uthakazelelwa kangaka, akutsho ujayele ukutshayela ngaphi umculo wakho njalo abantu bangakunxusela kuyiphi imicimbi?
NK: Mina njengomhlabeleli ngijayele ukutshayela endaweni ezinengi ezehlukeneyo zelizwe, ngiyanxuswa emicimbini eyehlukeneyo lasezinkonzweni. NgoMgqibelo lo odluleyo bengitshayela Esiqongweni ngiloAllen Ndoda.
AN: Bunzima bani elihlangana labo kwezomculo?
NK: Ubunzima obukhulu engihlangana labo yindaba yokuthengiswa kwezingoma ngoba ezikhathini ezinengi umculo wethu uthengiswa ngokungekho emthethweni njalo kuyasibulala njengabahlabeleli ngoba sicina singatholanga lutho.
AN: Nkuthazo bani ongayipha abahlabeleli?
NK: Engingakutsho yikuthi ukuba ngumhlabeleli kufuna ukuzinikela kakhulu lokusebenza gadalala.
