uMthunywa
Ethel Ncube
ZISELE zibambe owangaphansi izakhamizi zeTengwele Line eGwanda ngemva kokuba amadoda amabili etshaye omunye umfana amkhumula amazinyo waqumeka leminwe kubangwa ukuba uphendulelani indaba engaqondananga laye.
Lokhu kwenzakale emavikini amabili adluleyo lapho uBongani Ncube atshaywe khona kabuhlungu bethi bafuna ubuchopho bakhe. Abasiki bebunda baveze ukuba icala leli kukhanya seliphelele emoyeni ngoba omunye wamapholisa engasacaci ukuba indaba yakhona iqonda ngaphi.
Ekhuluma loMthunywa omunye wezakhamizi ongathandanga ukuqanjwa ngebizo uveze ukuba amacala kulindawo andise ukuphelela emoyeni.
Sesihlalela evalweni lapha ngoba abafana abanengi sebegangile kakhulu, bayatshaya abadlali njalo ababotshwa, indaba zakhona ziphelela emoyeni.
“Mhla wesehlakalo lesi uBongani wayesebhawa kunathwa kwangena u-Emmanuel Ncube wafika wabuza ukuthi omunye umuntu ungaphi uBongani wasephendula kungabuzwanga yena, kwahle kwaqala indaba.
“Bamfaka impama bahle bamdonsela phandle bathi bafuna ubuchopho bamtshaya ngoba ephendula indaba ezingaqondananga laye waze waqamuka iminwe amazinyo wonke aphuma,” kubika umfakazi lo.
Uqhubekele phambili echaza ukuba umfana lo otshayiweyo udinga ukuncediswa ngoba unina ngumfelokazi njalo abamtshayayo ababonakali.
“Umfana lo umatshaywa kalacala ngitsho kodwa nxa sekukhulunywa sekuthiwa nguye olecala yena equmeke iminwe ngoba sekulabanye abadlimali asebephendulela indaba. Unina udinga usizo ukuba ancediswe kumbe amagqwetha angamncedisa indaba yakhe iyephambili ingapheleli emoyeni abantu abalecala babotshwe.
“Laba abalecala bake babonakala sebezwana lelinye ipholisa okokuthi vele akuselacala elikhona, indaba isiphelele emoyeni ngapha umfana lokhe efuthelwa kungelamuntu obotshiweyo,” kuveza umfakazi lo.
Intatheli ixhumane lokhansila wakule indawo uMnumzana Costa Ndlovu ochaze ukuba udaba olunjalo lufikile kuye.
“Umama ozala uBongani ufikile ezongilandisela ngesehlakalo lesi, ufike kimi esevela esibhedlela engilandisela ukuba umfana bamtshaya bamlimaza. Abamtshayayo omunye wakhona usebenzela eBotswana, nxa elokhe engakabotshwa ulakho ukubaleka.
“Izakhamizi azilethi inhlupho kimi ukuze zincediseke kuhle. Ziyazithulela, angazi kumbe yikuswela ulwazi kumbe yini,” kuveza ukhansila.
