uMthunywa
Langelihle Moyo
ABALIMI sebexwayiswe ukuthi bavikele ukutsha kweganga ngokwenza imikhandlo (fire guards) evikela ukumemetheka kwemlilo ikakhulu ngesikhathi sebusika.
Umlilo wendle ubangela ukutshabalala kweganga njalo wenza izifuyo ziswele amadlelo kukanti ubuya utshise lentango zamasimu abalimi.
Inhlanganiso ye-Agritex ixwayise abalimi ukuthi bavule imikhandlo ezavikela ukumemetheka komlilo ngesikhathi lesi kulomoya.
UMnunzana Dumisani Mbikwa Nyoni onguMqondisi kunhlanganiso ye-Agritex esabelweni seMatabeleland North, uxwayise abalimi ngokuqakatheka kokuvula imikhandlo yemlilo.
“Ngalesisikhathi abalimi sibaxwayisa ukuthi bavule imikhandlo begombolozela amasimu abo, ukuze nxa kungaqhamuka imlilo yendle ingangeni emasimini abo,” kutsho uMnu Nyoni.
Uthe imlilo yendle ilakho ukubangelwa ngabalimi betshisa amabibi emasimini besebekhohlwa ukucitsha ukuwucitsha.
“Abalimi nxa betshisa amabibi kumele babone ukuthi bayacitsha imlilo le ngoba kungaba lomoya umlilo lo uyamemetheka iganga lonke, njalo lokhu kubangela ukuthi kusale kungela zihlahla lotshani umhlaba usulugwadule.
“Izifuyo ziyaswela ukudla kuthi inyamazana lazo zilakho ukutsha. Imizi layo kuyenzakala ukuthi itshe labantu balimale ngesikhathi umlilo lo umemetheka,” nguMnu Nyoni lowo.
Uphethe ngokugcizelela ukuthi abantu bangahambi bebasa imlilo besebetshiya kungela okhangeleyo kumbe bengasabuyeli ukuyakhangela bawucitshe.
Uthe abantu nxa belindele amabhasi ikakhulu emaphandleni ngalesikhathi sebusika kuyaqanda, bafika babase umlilo bawothe kodwa-ke nxa ibhasi sifikile bayatshiya umlilo lowo okungenye yezindlela ezibangela ukutsha kweganga.
“Kuqakathekile ukuthi abantu bacitshe umlilo abayabe bewubasile nxa belinde amabhasi. Ababhemayo labo sibaxwayisa ukuthi bananzelele nxa belahla izitompi zegwayi ngoba kuyenzakala baziphosele lapho okulotshani khona kucine kubangela umlilo weganga,” nguMnu Nyoni.
Uphethe ngokuthi kungenzakala kuqhamuke umlilo wendle, abantu kumele babikelane bancedisane ukuwucitsha ngoba imvelo yinotho yethu sonke.
