uMthunywa
UMZALI wonke ulesifiso sokuthi umntanakhe athole imfundo ngoba phela lilifa lomuntu angeke alithathelwa yiloba ngubani.
Yiso lesi isizatho esenza abanye abazali bahambe ngamathenesi lezicathulo ezibhobokileyo imali yonke isiphelele ekubhadaleni imali yesikolo.
Okudanisayo kodwa yikuthi lanxa kunjalo abanye abantwana abakunanzeleli ukuthi abazali bathwala nzima ukuthi bathole imfundo.
Esikhathini sokuthi umntwana afunde aqinise ukuze abe lekusasa enhle uchitha isikhathi ephatheka kuzenzo ezingelancedo ezifana lokubaleka esikolo, ukusebenzisa izidakamizwa, ukuya kumicimbi yabatsha yakulezinsuku ama-vuzu kanye lokugijimisa abesilisa.
Kukanengi sifunda kumbe sisizwa ngabantwana ababanjwa esikolo benatha utshwala, besebenzisa izidakamizwa kumbe njalo belazo ezikhwameni zabo zesikolo.
Okudanisa kakhulu yikuba akusakhethi abafana lamankazana bonke sebeziphatha ngendlela efanayo futhi besesebancinyane.
Ukuziphatha okunje kulihlazo njalo akufanelanga kwenzakale.
Umbuzo osuka ubekhona kwesinye isikhathi nxa umuntu ekhangela izehlakalo ezenzakala ezikolo kunye langekhaya lapho abantwana abagila khona imikhuba yikuthi kambe kunga lababantwana bakhuliswa ngendlela enjani.
Yebo kambe singabazwela abazali sithi kufana lokuthi imali yabo ijikelwa emlindini kodwa kusuke kungazwisiseki ukuthi abantwana laba bakwenza njani nxa bevele besuka emakhaya alomthetho.
Phela abadala bathi sigoqwa sisemanzi, kambe lezi zigogo ezinatha utshwala, zisebenzise izidakamizwa zagoqwa yini zisesemanzi? Impendulo engaba khona kwabanengi ngeyokuthi abazange bagoqwe lababantwana yikho nje besenza ihlazo elinje.
Okusuka kuzwise ubuhlungu njalo yikuthi indaba zakhona zobungezwa babantwana besikolo ziya zisanda okutshengisa ukuthi indlela abantwana abakhuliswa ngayo akuseyiyo efana leyakudala.
Kwakungajwayelekanga ukuthi ufunde kumaphephandaba ukuthi abafundi babanjwe esikolo besebenzisa izidakamizwa kumbe njalo sebenze lokhu lalokhuyana.
Singazi kumbe abazali balamuhla sebesehluleka ukupha abantwana umthetho kumbe abantwana bakhona yibo asebesehlula.
Okunye mhlawumbe osekusenza abantwana benze ihlazo elinje yikuthi abahlali labazali, sokuyimvama phela kulezinsuku ukuthi ubone abantwana besele bodwa kumbe behlala lezihlobo, abazali babo bephetsheya kwelizwe.
Yindaba ebuhlungu sibili ngoba abantwana yibo phela abakhangelelwe ukuthi baphathe ilizwe, pho ke bazaliphatha njani bona bengaziphathanga.
Kuqakathekile ke ukuthi abantu abadala babone ukuthi bayazama ngamandla wonke ukubakhulisa ngendlela ezenza ukuthi sibe lababusi abaqondileyo.
Bangathi nxa bebona umntwana esona bakhangele eceleni bathi ngoba lowo mntwana kasi wabo, kumele umqondo wokuthi umuntu wonke omdala ngumzali wakhe wonke umntwana uhlale ukhona engqondweni zabantu ngoba yiyo indlela engenza abantwana bagoqeke.
Abantwana labo kusamele bavume njalo bathande ukuqondiswa yiloba ngubani bayekele ukuba ngomehlo mehlo ngoba akusoke kubasize ngitsho empilweni.
Kumele bazi ukuthi umuntu uyazilungisela impilo yakhe esesemncinyane njalo imfundo yindlela enhle yokulungiselela impilo, pho ke nxa umuntu kulokuthi aqinise esikolo yena asuke aqinise izidakamizwa asazi ukuthi ikusasa yakhe iyabe imi njani.
Angakhali umntwana onjalo kusasa nxa esebona abanye bakhe besenza imisebenzi emihle njalo bekhomba ngophakathi yena esidla inqweqwe zomlomo ngoba uyabe laye ithuba waliphiwa kodwa wabona kungcono ukuthi asebenzise izidakamizwa.
