uMthunywa
Ethel Ncube
AKUBIZWA ozwayo kuyonale impelaviki koDakamela, eNkayi lapho abenza okuhle emphakathini kunhlangothi ezehlukeneyo abazanikwa izicoco kumcimbi wesibili wama-Chief Dakamela Appreciation Awards.
Umcimbi lo uzaqala ngoLwesihlanu ugqitshwe ngoMgqibelo.
Inhloso yokunika abantu izicoco yikugqugquzela abanye ukuthi benze okwehlukileyo okuphathisa umphakathi.
Kumcimbi lo kuzabe kubukiswa ukudla, impahla yesintu kanye lakho konke okuphathelane lamasiko abantu kuphindwe kube lezifundo ezitshiyeneyo kanye lokuhlonitshwa ngezicoco kulabo abenze kuhle.
Ekhuluma lentatheli induna uDakamela uveze ukuba amalungiselelo omcimbi asezingeni eliphezulu.
“Amalungiselelo abengekho lula kodwa konke nje kuzahamba kuhle. Umcimbi wethu uzakwenziwa amalanga amabili, mhlaka 5 Mabasa lo 6 Mabasa eNkayi koDakamela.
“Sinanzelele ukuthi izikhathi ezinengi, abantu abenza kuhle bahlonitshwa ezimfeni kodwa ngomcimbi ofana lalo sihlose ukuthi sihloniphe abantu besadla amabele ukuze bakwazi ukuthi benze kuhle emphakathini,” yinduna uDakamela leyo.
“Emcimbini lo sizabe silezifundo ezinengi ezitshiyeneyo kuzabe kufundwa ngendaba zamasiko, indaba zokuhlukuluzwa ngobulili kubuye kukhangelwe ezemvelo kufundiswe langomkhuhlane wengculazi lokunye okutshiyeneyo,” kutsho induna uDakamela.
“Sizabe silabeYunivesithi yeLupane leBulawayo Polytechnic bazabe bekhona lokhu sikwenza ngenhloso yokuba abantwana bakithi bafunde belethemba lokuba labo bayefika emakolitshini baqeqetshe bafike emayunivesithi,” kubika induna uDakamela.
Uqhubekele phambili eveza ukuthi umcimbi wakhe awusiwo wokupha izicoco kuphela kodwa kunengi okumunyethweyo.
“Umcimbi lo awukhangeli izicoco kuphela kodwa ngizama ukuba kube lezinto ezinengi ezitsheyeneyo. Ngiqinisa Ubuntu lokubambana kungelani lokuthi uvela ngaphi?
“Emcimbini lapha bakhona abazabe bebukisa impahla zesintu kubuye ukudla lokunye okutshiyeneyo lokhu kwenza singakhohlwa ngamasiko ethu futhi kuyasiphathisa ukuthi siwalondoloze,” kuphetha induna uDakamela.
