uMthunywa
Ncekwenhle Ncube
NGENXA yesimo somkhathi esitshintsha njalonje osokudale indlala ezigabeni ezinengi eBinga kulenhlelo esezisungulwe yinhlanganiso yeLinkages for Economic Advancement for the Disadvantaged (LEAD) ezokulwisana lendubo zamanzi lokudla kwezifuyo.
Imideni eminengi ithembele ezifuyweni zazo ukuzuza ukudla ngokulima, uchago lenyama ngakho-ke nxa sezisifa ngenxa yendlala lokuswela kusuka kube luhlupho oluhlasela isizwe sonke.
Kungakho inhlanganiso ezimele yodwa yeLEAD incedisana leWorld Food Programme (WFP) incedisa abantu abafika 45 841 ukulwisana lendlala yezifuyo kumhlubulo lo.
Kubikwa iLEAD isiza isigaba lesi ukulwisa udubo lwamanzi olubulala izifuyo ngokugebha amadamu. Lokhu kwenza ukuthi izifuyo zingahambi umango omude zisiyadinga amanzi okunatha okwenza impilakahle yezifuyo ibengcono.
Ngenxa yokuthi indawo le iyatshisa kakhulu njalo kubanzima ukulima kule indawo abantu bakule indawo bazithola befuya inkomo ngoba kuyiyo kuphela indlela elula abangaziphilisa ngayo.
Ngaphandle kokusiza ezifuyweni iphurojekithi yeLEAD isincedise indawo yeBinga ngokuzuza ukudla kokufaka eziphaleni okuvela ezivandeni ezithelezelwayo okungasiza ukulwisana lendlala.
Kubikwa iLEAD siyakhe amadibha amahlanu incedisana leWFP ngenhloso yokulwisana lemikhuhlane etshiyeneyo.
UMnumzana Tawanda Gonye obona ngezifuyo eBinga uchaze ukuthi kudingeka ukuthi kukhuphulwe izinga lokufuya inkomo kule indawo ukuze ezomnotho zikhuphuke.
“Okwenza ezokufuya zingathi zisezingeni eliphansi yikuswelakala kwamadlelo aqondileyo. Noma kunjalo kuyadingeka ukukhuphula izinga leli,” kutsho uMnu Tawanda.
Inkomo ezizadibhiswa lapha zibalisela inkulungwane ezilitshumi.
Induna yakulindawo uMnumzana Sinansengwe ubike ukuthi inkomo zingumgogodla kumnotho wakulindawo ngakho ukwakhiwa kwamadibha kube yisibusiso kubo.
“Inkomo yizo ezisibambele impilo ebantwini bakithi. Sizuza uchago, inyama njalo yizo esilima ngazo. Kungakho-ke ngokwakhiwa kwamadibha ngilethemba lokuthi impilakahle yazo izabangcono,” kuphetha uMnu Sinansengwe.
