uMthunywa
Pumulani Mpofu – Umntwana uyisibusiso esihle esivela kuNkulunkulu, uyisithelo esihle emtshadweni njalo uveza uthando lokuthuthuka kwezimuli. Ekuzalweni komntwana izimuli ziba lokujabula zize zitsho amazwi athi, “amhlophe”. Umntwana nxa esezelwe ikusasa lakhe libekwa phezu kwezandla zabazali.
UHulumende ukubeka sobala ukuba umntwana ulamalungelo ukuze abe lekusasa elihle. Elinye lamalungelo aqakathekileyo lilungelo lokwaziwa (right to identity). Lelilungelo litsho ukuthi umntwana kumele abe lencwadi eziqakathekileyo ezifana lencwadi yokuzalwa kanye lesithupha. Umntwana angathola incwadi lezi uyabe sesaziwa elizweni njalo usesenelisa ukuthola ilungelo lakhe lemfundo, akhule aze afike ebangeni lokuthatha isithupha.
Incwadi yokuzalwa iyisiqokoqela empilweni yomntwana. Lapho umntwana esethole incwadi yokuzalwa uyenelisa ukubhala imihloliso yakhe esikolo efana lekaGrade 7 kanye le O-Level.
Kuliviki ngithole ithuba lokuxoxisana lodade okuthiwa nguSihle Mthombeni, oleminyaka engamatshumi amabili lane. USihle ulencwadi yokuzalwa kodwa akalaso isithupha ngenxa yokuba inombolo zesithupha zikanina kazikho encwadini yakhe yokuzalwa. USihle ulabantwana abathathu uMthandazo, uSiphiwe kanye loQinisani. Bonke abantwabakhe kabalazo incwadi zokuzalwa ngoba unina kala sithupha. Lokhu sekubangele ukuthi abantwabakhe bengenelisi ukuthola ilungelo labo lokwaziwa njalo kwenza kubeluhlupho ukubana baqhube kuhle ezifundweni zabo.
Umntwana wesithathu, uQinisani wamzala lendoda abahlalisanayo okuthiwa nguBongani Moyo. Laye kalaso isithupha. Lokhu sokwenze ukuba uQinisani engenelisi ukuba athole incwadi yokuzalwa.
Isimo esinje siveza sobala ukubana ikusasa elihle lomntwana lisezandleni zabazali. Izincwadi ezifaneleyo zenza kubelula ukuthi umntwana abe lekusasa elihle njalo kwenza umntwana agcineke lula lapho abazali bakhe sebethe badlula kulo umhlaba.
Nxa umntwana elencwadi yakhe yokuzalwa kubalula futhi ukuthi athole isithupha sakhe sesikolo ukuze enelise ukuba adinge umsebenzi. Imfundo yenza kubelula ukuthi umuntu abe lekusasa elihle.
Ikusasa labantwana lisezandleni zabazali kungakho ngithanda ukuthi ngithi bazali kasilungiseleni abantwabethu incwadi zabo ezifaneleyo ukuze benelise ukuthola amathuba lamalungelo abapha ikusasa elihle.
Siphinde sihlangane njalo kuviki elizayo .
Umlobi utholakala kukheli elithi trinitytrust6gmail.com, loba umthinte ecingweni ku nombolo ezithi 0773195055/ 09-881508; ungabona njalo imisebenzi yethu ku www.trinityproject.biz
