uMthunywa
Yintatheli KaMthunywa
ZILOKHU zididekile izakhamizi zeBethel, eGwanda ngemva kokuba enye indoda izibophele ngoba ifelwe zinkomo zayo.
Kubikwa uMnumzana Lovemore Dube oleminyaka yokuzalwa engu-65 usuke wacabanga wafika ekucineni ngoba efelwe yizifuyo zakhe okungacacanga ukuthi zingaki, wabona kungasasizi ukuba aphile. Kubikwa ubhale incwadi ekhombisa ukuba abantu bazasithola ngaphi isidumbu sakhe ethi wenze lokhu ngoba inhliziyo yakhe ibuhlungu ngesibaya sakhe. Ekhuluma lentatheli omunye wezakhamizi zakulindawo uMnumzana Pakiso Tlou uthe lokhe belesithuli ngesiga esibehleleyo njengezakhamizi zakulindawo ngoba umuyi engumuntu omdala obekhangelelwe ukweluleka abancane.
“Silokhe silesithuli ngesiga sokuzibulala kukaDube nanko phela besikhangelele ukuthi yena labanye abadala esigabeni yibo abeluleka intsha nxa yehlelwe zinhlupho pho manje nxa yena uDube ehluleke ukuzibamba ngemva kokwehlelwa ngamashwa la asazi ukuthi sicabangeni.
“Abaseduze laye bathi usuke wafuthelana ngokulahlekelwa yizifuyo zakhe wabona kungcono azibophele. Isimanga yikuthi wonke umuntu ufelwe yizifuyo esigabeni sakithi kodwa asazi ukuthi yena kuyini okumenze wangakwamukeli lokhu njengoba bekuludubo lomuntu wonke,” kulandisa uMnu Tlou.
Isikhulumi samapholisa esabelweni seMatabeland South uInspector Philisani Ndebele ebuzwa ngodaba lolu uvumile wathi solufikile ehofisini yakhe. Uthe kuqakathekile ukuthi abantu badinge umuntu abangakhuluma laye nxa behlelwe yinkinga ukuze bathole ukwelulekwa.
“Udaba lwendoda ezibopheleyo solufikile ehofisini lethu kodwa kithi akuchasiswanga imbangela yokuzibophela. Abantu kumele badinge abangabeluleka nxa bekhathazekile hatshi ukuzibulala ngoba lokhu kuzwisa abaseleyo ubuhlungu.
“Ongabe elohlupho kadinge isihlobo esiseduze asithembayo, abaphathi besigaba kumbe amapholisa ukuze axwayiswe hatshi ukuthatha impilo,” kuphetha uInsp Ndebele.
Kunyanga ezedluleyo inkomo zabantu abanengi elizweni zicubile kubangelwa yikoma. Abanye balahlekelwe yimihlambi engafika inkomo ezedlula amatshumi amane kwezinye izigaba.
