uMthunywa
Nkosilathi Sibanda
“Babethi awubulawe, kodwa awusoze ubulawe.”
Umutsho lo uchaza ngqo isimo somculo wembube kuleli, wona osukhule wasabalala ngesikhathi abanye becabanga ukuthi usutshabalele.
Ngokunjalo, ukuqina kwembube kuzabonakala mhla iqembu le-Great Stars Ijongosi lisungula idlalade lalo lesihlanu elithiwa Ijongosi, enkundleni yeBulawayo Theatre ngoMgqibelo.
Kubikwa lo uzabe ungumbuthano ongathambanga ngoba ingqungquthela zesicathamiya lezi, iGreat Stars Ijongosi, zethula idlalade leli ngemva kwesikhathi abalandeli balo belindele amaphimbo amatsha.
Kwaqhamuka umkhuhlane weCovid-19, kwaba yikucina kwalo ukukhipha idlalade. Umkhokheli weqembu uPhilani Donga utshele uMthunywa ngoLwesibili ukuba okwakhathesi, abalandeli besicathamiya bazakholisa.
iCovid-19
Kumkhosi wangoMgqibelo, iGreat Stars Ijongosi izabe isethula idlalade elitsha incediswa yinkampani ye-DAB Three Events.
“Sethula idlalade lethu elithi Ijongosi ngemva kwesikhathi eside sacina ukukhipha idlalade. Umcimbi wokwethula idlalade leli uzaqhutshwa eBulawayo Theatre. Sacina ukwethula idlalade ngomnyaka ka2019, elithiwa Konke Kulungile. Ngenxa yeCorona eyasincindezelayo yikho sithethe ithuba ukukhupha idlalade leli elika2023,” kutsho uDonga.
Bulawayo-Theatre
“Leli lidlalade lethu lesihlanu. Sinxusa bonke abathandi bomculo wethu ukuthi baze ngobunengi babo basekele umsebenzi wethu.”
Iqembu leGreat Stars Ijongosi lakhipha amanye amadlalade abalisa UmaDewa (2013), Ithaya (2016), Ithempeli (2018), Konke Kulungile (2019).
“Sithembisa ubuhle lobunandi bodwa kulelidlalade elitsha ngoba liphekwe ngobunono njalo zikhona ingoma ezikhangelelwe ngabalandeli ezifana lezithi Gomora, Amalanda, Caroline lale ebambe isihloko sedlalade,” kutsho uDonga.
Uthe ekukhipheni idlalade labo, basekelwe njalo ngabahlabeleli ababalisi uAdoe loGagisa.
