uMthunywa
Buhlebenkosi Gaule
KULOJAHA weNkayi omiswe phambi komthethwandaba weTredgold koBulawayo esetheswa icala lokubhinya umfana oleminyaka engu-16 ethi ufuna ukumfundisa isifundo.
Umsolwa uBrighton Masuku oleminyaka yokuzalwa engu-18 wenze icala leli mhlaka 22 Nkwenkwezi eNsuza kuVillage 3.
Umtshutshisi kulelicala uMnumzana uNelson Dlodlo ubikele inkundla ukuthi ngalelolanga umsolwa wahlangana lomamangala emadlelweni elusile wathi ufuna ukumfundisa isifundo ngoba uyadelela.
Intatheli yephephandaba izwe ukuba uMasuku walaya umamangala ukuthi ehlise ibhulugwe aguqe phansi ngoba efuna ukumtshaya ngoswazi ukuze angaphindi ukumdelela.
Umamangala waguqa ecabanga ukuthi uzatshaywa ngoswazi kanti wayengabuzanga elangeni ngoba umsolwa wayefuna ukumbhinya.
Ngemva kokwenza ihlazo leli umsolwa walaya umamangala ukuthi angatsheli muntu ngokwakwenzakele.
Indaba le ivele mgceke ngemva kokuba ugogo kamamangala enanzelele ukuba umzukulu wakhe wayesehluleka ukuhlala wasembuza ukuthi kutheni.
Umamangala wachazela ugogo wakhe okwakumehlele okwenza indaba le yahle yayabikelwa amapholisa eNsuza, umamangala wahanjiswa esibhedlela seSt Lukes lapho ahlolwa khona ngudokotela kwabhalwa incwadi kadokotela ezasetshenziswa njengobufakazi emthethwandaba.
Umantshi uAdelaide Mbewure udlulisele phambili ukuthoniswa kwecala leli kumhlaka 20 Nhlangula.
