uMthunywa
KULE iviki iphephandaba likazulu lize lezimnandi kwezokuzithokozisa njalo nanko phela liphethe imbongi yodumo engena kuthintitheke umuhlwa ezihlahleni.
Kambe kungaba ngubani imbongi le ngaphandle kukaDumisani Mhlanga ingadlangadla yejaha.
Othanda ukuzithokozisa kule iviki nansi ingxoxo ethathekisayo phakathi kwentatheli yephephandaba likazulu uCornelius Luphahla (CL) lembongi le uDumisani Mhlanga (DM).
CL: Akuthi fahlafahla jaha lakithi mayelana lembali yakho njengembongi kazulu.
DM: Mina ngazalwa mhlaka 5 Lwezi ngomnyaka ka1976 koBulawayo esibhedlela seMpilo.
Ngo 1983 ngayafunda uGiredi 1 eMafakela Primary khonapha koBulawayo kwathi ngo1985 ngasuka ngayafunda eSolusi Primary ngaze ngaqeda imfundo yami yaphansi.
Ngaqhubeka ngezifundo zami ngaya kuFomu 1 eSolusi Secondary ngo1990.
Ngadlulela phambili ngezifundo zami sengisiyafundela i-degree le-Animal Husbandry e-Unisa kweleSouth Africa ngaphinda njalo ngenza lezokuhaya lokucula kuGqozi Lwesiko Arts, elinye lamakolitshi eSouth Africa.
Ubumbongi ngaqala ngesikhathi ngisafunda ePrimary ngaqhubeka ngabo ngaze ngayaqeda uFomu 4 noma nje ngangingakaziwa kakhulu.
CL: Tshela uzulu ukuthi kungani wakhetha ukuba yimbongi mfokaMhlanga?
DM: Mina okwenza ngaba yimbongi yikuthi ngazalwa lakho njengesipho engasiphiwa nguNkulunkulu.
Okunye njalo ngabuya ngakuthanda ukuhaya ngoba ngizizwa ngithokoza kakhulu nxa ngihaya emphakathini.
CL: Njengembongi sowakhipha amadlalade amangaki njalo wandisele ukuhayela ngaphi?
DM: Lokhe ngaqala ukuhaya ngakhipha idlalade elilodwa ngo2006 elithi Uzulu Omnyama.
Ngemva kwalokho ngancedisana labaculi abatshiyeneyo ekukhipheni amadlalade.
Ngincedise uKhuxman kudlalade lakhe elithi Dlala Nyawo Lwami, ngahaya njalo kudlalade likaCont Mhlanga elithi iBosso elika2016.
Omunye njalo engasebenza laye nguRaisedon Baya kumdlalo wakhe othi Uhuru.
Khathesi ngihayela iMusic Intertainment ekhokhelwa nguSilo Sibanda.
Ngandise ukunxuswa emitshadweni, emidlalweni kanye lemikhosini etshiyeneyo.
Ngilakho njalo ukubizwa ngabantu abehlukeneyo nxa belemidlalo yabo ngiyejabulisa uzulu.
CL: Abantu bathini ngomsebenzi wakho lo owenzayo njalo ukhangelele ukubenzelani lonyaka?
DM: Abantu bayawuthakazelela kakhulu umsebenzi wami lo bathi ngiyabajabulisa ngakho bathi ngiqhubekele phambili ngihaya.
Lonyaka ngikhangelele ukuqhubeka ngijabulisa uzulu njalo ngisazopheka elinye idlalade ukuze uzulu enelise ukuvuseleleka kwezembongi.
CL: Ngaphandle kokuba yimbongi msebenzi bani owenzayo jaha lakithi?
DM: Ngaphandle kokucula mina ngingumfuyi ngifuya izinja eMarula eMangwe leLuveve 4.
Izinja lezi ziyimihlobo etshiyeneyo njalo ngizifuyela ukuzithengisa.
CL: Njengembongi endala bunzima bani oyake uhlangane labo emsebenzini wakho lo njalo nkuthazo bani oyipha imbongi ezisacathula?
DM: Ubunzima engiyake ngihlangane labo njengembongi yikuthi abantu basuka bangitshontshele inkondlo zami bazithengise ngentengo ephansi.
Yikho sengiqakathekisa ukuhaya emikhosini kumbe emidlalweni.
Kubaculi kanye lakumbongi ezisacathula ngikhuthaza ukuthi baqhubekele phambili besebenza nzima bengadeli ukucula lokuhaya ngoba kuyinto eqakathekileyo kakhulu.
Okunye njalo ngibakhuthaza ukuthi bahloniphe uzulu ukuze bathuthuke kwezokuthokozisa uzulu.
