uMthunywa
YiNtatheli kaMthunywa
UMHLUBULO weMatabeleland ulabahlabeleli abaleziphiwo ezimangalisayo kodwa abanengi babo baziqhunsa beseGoli njalo lokhu yikho okwenza abanengi babo basalele emuva.
Abasiki bebunda baveza ukuthi leyi ngeyinye imbangela yoswelakala kwabahlabeleli abavela kulumhlubulo abakhethwa kusicoco somkhosi we-National Arts Merit Awards (Nama).
UEsau Siwela umculi weTsholotsho njalo ehamba leqembu leZinkulu Production useveze ukuzisola okukhulu ngokuhlala eGoli isikhathi sonke lesi.
“Kusukela ngo-2009 bengilokhe ngiqhunsa leqembu ngiseGoli, ngacina sengibona kungcono ukuthi ngikhumbule ekhaya ngomnyaka ophelileyo.
“Sabalusizi njengeqembu ngemva kokunanzelela ukuthi lapha kwelakithi akulamuntu osaziyo okuyinto engafani lanxa siseSouth Africa.
“Leyi yinkinga ebhekane lenengi labahlabeleli bakuleli njalo kumele baziphendukele ekhaya nxa befuna ukuthuthuka ngoba ukuhlabelela abantu beGoli akubasizi ngalutho.
Kuzababisela emuva,” kutsho uSiwela.
USiwela leqembu lakhe elitshaya umdumo we-rhumba lonyaka like laqhunsa emkhosini kaMongameli owe-21st February Movement oqhutshelwe edolobheni leVictoria Falls kunyanga edluleyo.
Ngomnyaka ka2013 laqhunsa kumkhosi we-Shangano Arts Festival owaqhutshwa eTsholotsho.
Kukanti selihwatshe idlalade elitsha elithi-Umhlaba ujikile elilengoma eziyisikhombisa.
Leli idlalade eseliqalile ukudlalwa kumsakazo we-Radio Zimbabwe lilengoma edumisa iqembu leTsholotsho FC ngokwenelisa kwalo ukungena kuligi.
Ezinye ingoma zalo zigoqela ezithi Vumani vumani, Ndodana yami, Ngoneni kini lethi Sikhuleka kuwe phakathi kwezinye.
