uMthunywa
Nkosilathi Sibanda
IDYNAMOS kayilamali kodwa iyamthanda uKhama Billiat!
Mhlawumbe yikho okungachaza ngcono ubudlelwano obukhona phakathi komdlali wenguqu uKhama Billiat leqembu leDynamos kulandela izehlakalo zensuku ezisanda kwedlula.
IDynamos yaba liqembu lokuqala ukuncenga ukuthi uBilliat azodlala kuyo. Bekusele kancane ukuthi bamkhombise avume lumdlali kodwa sekuvele ukuthi usehluthunwe liqembu le-Yadah Stars, elikaMphurofethi uWalter Magaya.
IZimpapers Sports Hub iyakuveza ukuthi uBilliat, obengumdlali weKaizer Chiefs yeSouth Africa, usezadlalela iYadah Stars kuligi yeCastle Lager kulisizini.
Ngesikhathi iDynamos igcwalisa amaphephandaba ibika ngokuzigqaja ukuthi izadlalelwa yingcitshi enguBilliat kumaviki amabili adluleyo, kube yinjabulo ephangise ukuphela ngoLwesithathu ntambama sekuvele iqiniso lokuthi uBilliat uhlangabezwe liqula lenkokheli zeYadah Stars egcekeni lendizamtshina eleRobert Mugabe International Airport, okuveze ukuthi usezandleni zaleliqembu.
Kulabo abamukele uBilliat egcekeni lendizamtshina kubikwa bekulomaqhuzu weYadah Stars u-Admire Mango.
UBilliat uza kuleli ngemva kokwehlukana leKaizer Chiefs ngesizini edluleyo. Abasiki bebunda abaseHarare, bachathekele uMthunywa umbiko wokuthi iYadah Stars iphethe isivumelwano esilemali ephezulu kulaleyo ebizakhitshwa yiDynamos.
“Loba ubefuna ukudlalela iDynamos, ukhethe ukuthi akhulumisane leYadah ngoba ikhululeke ukuthi imholise imali engcono,” kutsho umfakazi lo oseduzane lodaba.
IYadah Stars isithe kayisoze imboleke enye ithimu uBilliat.
“Kukhitshwe imali enengi kubhadalwa lumfana. Amahungahunga la athi uBilliat uzacina ekuDynamos ngamanga. Isivumelwano sakhe leYadah ngesesikhathi esincinyane, mhlawumbe uzavuma ukusayina okwesizini kuphela. Okwenani lemali kuzavela kumalanga alandelayo,” kutsho umfakazi lo ongasathandanga ukuveza okunengi.
Kusenjalo, loKudakwashe Mahachi okwakucatshengelwa ukuthi uzadlalela iDynamos kuzwakala ukuba usetshintshe umqondo.
UMahachi, ongumdlali obalelwa kulabo abalethalenta uqobo, usuka kuqembu leMedeama eleGhana. Wazakhela udumo kuleli kumaqembu abalisa iHighlanders leChicken Inn andubana ayeqhelisa umdlalo kweleSouth Africa.
Kumalungiselelo esizini yalonyaka, iDynamos isizame ngamandla ayo wonke ukuthi ikhombise ingcitshi zabadlali. Izame ukukhombisa u-Obriel Chirinda yathathelwa yiNgezi Platinum Stars.
IDeMbare iphakathi kokubumba iqembu eliqinileyo ngoba izancintisa kumqhudelwano weConfederation of African Football kulisizini.
