uMthunywa
Ethel Ncube
KULEMULI yakoSibanda yeVictoria Falls ebhekane lobunzima obukhulu nanko ihlala esambuzi futhi iyehluleka ukuhambisa indodakazi yayo esikolo ukuze iqhubekele phambili ngezifundo zayo.
Imuli le esileminyaka emine ihlala esambuzi lesi, yabalekelwa ngubaba njalo bahlala bebane abantwana abathathu lomama ophathekileyo emzimbeni.
UMthunywa uxhumane lo-Mnumzana Obert Dube onguye ohamba phambili ekudingeleni imuli le uncedo ukuze umntwana lo oyinkazana aye esikolo.
“Imuli le ihlala lomama labantwana abathathu omkhulu wakhona unguForm 2 kufunakala imali yokumbhadalela indleko zesikolo. Imuli le, umama kasebenzi uphathekile emzimbeni akula lapho abathembele khona.
“Kufuneka iUS$12 ngethemu yokubhadala esikolo nyakenye ukhona owayethembise ukumbhadalela kodwa kasagcwalisanga isithembiso sakhe kungakho ulesikwelede seUS$210,” kubika uMnu Dube.
Uqhubekele phambili echaza ukuba ucela uzulu owenelisayo ancedise ukuze umntwana lo aqhubekele phambili ngezifundo zakhe.
“Umntwana lo ngahamba esikolo ngayacela ukuba abefunda ngoba lapho avela khona isimo sinzima. Abafisa ukuncedisa ngicela baxhumane lami ku 0712 336 972 sincedise umntwana lo.
“Akukho okuncinyane konke kuyaphathisa ukuze imuli le iphile impilo engcono. Lendawo lapho abahlala khona akulunganga, indawo le kwakhiwa izindlu kwasekusakhiwa isambuzi saba sodwa bona ngenxa yokuswela indawo yokuhlala bafika bahlala kuleso sambuzi. Isimo kasisihle ngitsho,” kuchaza uMnu Dube.
