uMthunywa
YiNtatheli kaMthunywa
IQEMBU elilolonga abadlali abasakhulayo kumdlalo we-chess, iChess Mates Academy ibika ukuba ikumalungiselelo wokuthenga impahla yokuvikela abadlali kugcikwane leCovid-19 ukuze imidlalo iqhutshwe ngemfanelo mhla isivunyelwe.
IChess Mates Academy ingeyinye yamakolitshi ezemidlalo atshisekela ukuthi athuthukise ithalenta labasakhulayo kulumdlalo. Njengayo yonke imidlalo, i-chess ibiphakathi kwekhefu kulandela ukuvalelwa yizinqumo zokwenqabela ukumemetheka kwe-Covid-19. Kungumbono wenkokheli ze-Chess Mates ukuthi mhla imidlalo yabo iqala, kube sekutholakale impahla ezasiza ukuthi kwenqatshelwe igcikwane.
Umqondisi weChess Mates Academy uPriscah Sibanda ubikele iphephandaba likazulu ukuba baphezulu kokuqoqa impahla ebalisa ama-mask, umuthi wokuhlanza izandla, isanithayiza, isepa lokunye okubalulekileyo.
“Mhla kuzabikwa ukuthi umdlalo we-chess usuvunyelwe sizabe sesilazo impahla zokuthi sivikile igcikwane. Lapha sikhangelele ama-mask, amasanithayiza lamasepa. Sifuna ukuthi sihlanze indawo esidlalela kuzo okuzwayo. Umdlalo wethu awudingi ukuthi abadlali bathintane, okuyikho okwenza kube lula ukuthi silandele zonke izinqumo.”
Uthe anduba baqale imbuthano yabo, bazakwelula ulwazi ngokuvikelwa kwe-Covid- 19 kubadlali labaqeqetshi.
“Imfundiso mayelana legcikwane leli izakubakhona. Khathesi abadlali, abazali labaqeqetshi sikhulumisana labo ukuze abadlali bethu abakhona, benanzelele ukuthi bayazivikela. Singakavuli imidlalo, sizakuba lemfundiso efanayo, sincediswa ngabe zempilakahle lengcitshi ezilolwazi kwezemidlalo lokuziphatha kwabadlali,” nguSibanda lo.
