uMthunywa
Pumulani Mpofu
ABANTU abansundu balamasiko atshiyeneyo kodwa phose bonke nje balesiko lokulobola. Nxa kuyikuthi ijaha selizibona selikhulile selilentombi liyayitshengisa umalume loba ugogo, likhulumisane lobabakazi walo ukuthi atshele uyise lonina ukuthi yena sekhulile sefuna ukuthatha. Ngemva kwalokhu ubaba lejaha sebengaxoxisana ukuthi babona ukuthi ijaha lifuna ukusizwa ngaphi. Kusuka lapho sekungadingwa idombo elizahambisa indaba ngakibo kwentombi eyabe ifuna ukulotsholwa lijaha.
Intombi yona iyahamba lejaha layo kugogo, umalumekazi lakubabakazi ukuthi abantu abadala babekwazi ukuthi umntanabo sekhulile njalo selomngane osefuna ukuthi amthathe. Nxa kuyikuthi ijaha selilungisile intombi isingakhulumisana lobabakazi wayo ukuthi iyekwethula udaba lokuthi kuzaba labantu bemzini abazafika ngelanga elithile.
Nxa selifikile lelolanga elokuthi ijaha lizovela, liyabuya labangakibo, kungaba ngobaba abamncane, abafowabo labobabakazi abazakhipha inhlawulo eziyabe zikhona kumasiko akontombazana. Kwandise nje ukuthi bengabuya bezokhipha okuncane, bahambe baphinde babuye njalo sebezokhipha amalobolo besebecela umtshado nxa abazali bentombi besithi umntanabo ngeke aphume emzini wabo engatshadanga.
Sebengahle bazame ukuthi bakhulume ukuthi bona bengabeka liphi ilanga ukwenzela ukuthi amalungiselelo omthimba ahle aqalise. Abazali abanengi nxa abantwababo bekhula bayafisa ukuthi bababone bekhula, bafunde, baqeqetshe babelezithupha ezinengi ezemfundo. Inengi labo njalo bafuna ukuthi abantwababo benelise ukuthi bathole abantu ababathandayo.
Kule iviki ngithole ithuba lokuxoxisana lejaha lakoMaisiri uJoseph. Ijaha leli ngumnewabo kaLuke onguye owona intombi yakoChawarika uAmanda. UJoseph nxa elandisa uthi umnewabo waphambanisa uAmanda, abakoAmanda babuya bazobika isisu, abakoJoseph babaphatha kubi. Kwahlala isikhatshana nje basebekhalala uAmanda kuLuke.
Njengoba uLuke wayelenkani kazange athande ukuthi akhulumisane labakwabozala, waqhubeka ehlala loAmanda baze babona sekungcono ukuthi baye eSouth Africa, lapho abafika basebenza okweminyaka emine andubana uAmanda agule adlule emhlabeni.
UAmanda esebhubhile abangakibo baqoqa imali ukuthi isidumbu sika-Amanda sibuye eZimbabwe. Bahle bathatha lendondana yakhe uTony besithi nxa kuyikuthi uLuke ufuna umntanakhe uzakhumbula emuva abuye azolobola umntanakhe njengoba wehluleka ukulobola umntanabo uAmanda.
Osekuzwisa uJoseph ubuhlungu yikuthi abangakibo kaAmanda abasabavumeli ukuthi babuye bazobona umzukulu uTony ngenxa yokuthi uLuke kalobolanga. ULuke laye umetheswacala kakho usejele eSouth Africa njalo akwaziwa ukuthi uzaphuma nini. ULuke wayecele umnewabo ukuthi abenguye umzali kaTony yena aze aphume ejele kodwa kasenelisi ukuthi afeze leso sithembiso. Abako Amanda bona batshela uTony ukuthi uyise wadliwa zindunduma zeGoli njalo sebeze bamthathisa incwadi yokuzalwa ngesibongo sabo ukwenzela ukuthi uTony engaxhumani labangakibo.
Njengenhlanganiso sixwayise uJoseph ukuthi baqoqe imali bayekhulumisana labangakibo kaAmanda ngoba phela nxa besithi bayawafuna amalobolo kumele bawabhadala ngoba bona umntwana wabantu. Ngithanda ukuthi ngixwayise amajaha ukuthi nxa engona abantwana babantu bahambe beyekhipha inhlawulo baziwe, hatshi ukuthi bahlale lecala ngoba phela icala aliboli, ngelinye ilanga kuyaphinda kukujikele futhi.
Asihlanganeni ngeviki elizayo.
Umlobi uthinteka kukheli ethi [email protected]; Laku nombolo ezithi 0773195055.
