uMthunywa
Nkosilathi Sibanda
UMGADLI weHighlanders uNewman Sianchali uselandele uGabriel Nyoni kweleBotswana ezama ukuyadinga iqembu ‘eligcono’.
UNyoni uyifulathele iBosso ngeviki edluleyo wasayina kuTownship Rollers. Kuliviki uSianachali ukubone kuqakathekile ukuthi laye ayekhonale ukuyaphanda amadlelo aluhlaza kuqembu leJwaneng Galaxy.
USianchali uleminyaka yokuzalwa engu-34 njalo umdlali lo ubengekho kumdlalo weHighlanders leHerentals eBarbourfields ngeSonto.
Ukudinga kwakhe umsebenzi eBotswana kuza ngemva kokuthi umdlali lo eyehluleka ukuhlohla kuBosso.
Abalandeli beqembu sebetshaye ukhwelo baze badinwa becela ukuthi akhitshwe eqenjini.
Ukuza kukaSianchali kuleliqembu bekuthembisa ukuthi uzawathela amabhola emambuleni kodwa akulanto aseyenzile. Usehlohle amabhola amabili kuphela.
Nxa ezaphumelela kuJwaneng Galaxy lumdlali kutsho ukuba umqeqetshi weHighlanders uMadinda Ndlovu kumele aqale phansi ukudinga umgadli.
IBosso ithwele nzima ukuthola umuntu olonyawo olubukhali.
Kusenjalo, iyaqhubeka imidlalo yeCastle Lager lapho iHighlanders ezangena umango iqonde eTriangle.
Isuka ekhaya iBosso ithembele ukuthi iyenqoba kulumdlalo nanko phela akuselathemba lokuthi izathabisa abantu bayo.
Imidlalo yeCastle Lager kulimpelaviki:
NgoMgqibelo: Harare City v Chapungu (Rufaro), Bulawayo Chiefs v Bulawayo City (Luveve), FC Platinum v Caps United (Mandava), Black Rhinos v Yadah (National Sports Stadium), Nichrut v Shabanie (Ascot)
NgeSonto: Dynamos v Ngezi (Rufaro), Herentals v ZPC Kariba (National Sports Stadium), Triangle v Highlanders (Gibbo), Mutare City v Chicken Inn (Vengere)
