uMthunywa
Thokozile Mbedzi
ABE-NOTTINGHAM Estate sebekhuthaze uzulu wakuleli ukuthi avakatshele epulazini labo eliseBeitbridge bazobona izithelo zamahalantshisi (orange) abazilime endaweni le esezibalethele ibhizimuzi enkulu kuleli kunye lakwamanye amazwe.
UNkosazana Bridget Gamuchirai Tsuro osebenza kunkampani le obekumbukiso wezokwethekelelana oweHlanganani/ Sanganai osanda kwedlula uthe abantu bakhululekile ukuzovakatshela epulazini labo babone ukuthi balima njani isithelo lesi kunye lendlela abenza ngama amanamunede ngaso baphinde babe yingxenye yezokuvakatshelana ezikule indawo.
“Silebhizimusi enkulu yesithelo samahalantshisi kuleli lakwamanye amazwe. Sikhuthaza uzulu ukuthi azosethekelela abone indlela esiqhuba ngayo ibhizimusi yethu.
“Singavuna ama-orange epulazini amanye akhona siwathengisa enjalo kukanti amanye siyawathatha senze amanamunede,” kuchaza uNkszn Tsuro.
Uqhubekele phambili esithi endaweni yabo abantu bangavakatsha balakho ukubethwa ngumoya baye ku-boat cruise, bush drive, fishing eyenziwa duzane ledamu leMushiloshokwe kunye lokuba lethuba lokunika inyamazana zendle ukudlab okwenziwa kusukela ngenyanga kaNkwenkwezi kusiya kuMpandula.
“Ukulima isithelo lesi kuyaphathisa izakhamizi zakule indawo ngoba lazo zithola amathuba emisebenzi kukanti amahalantshisi angavuthwa amanye siyawanika inyamazana ezifana lendlovu okuzenza zingabi lodlakela zicine ziquphuna izihlahla loba ukuqunta amahlamvu okwenza ibhizimusi lethu liqhubekele phambili.
“Kwezokwethekelelana abasethekelelayo bayathola njalo ithuba lokubona indlovu lezi lezinye inyamazana zizidlela ama-orange ngezikhathi zantambama besidla lazo nganxanye zisidla.
“Ezokwethekelelana zazalwa libhizimusi lokulima ama-orange,” kuphetha uNkszn Tsuro.
