uMthunywa
Ncekwenhle Ncube
IQEMBU labaculi beTsholotsho High eselitshaye labhubhisa ezinye izikolo emncintiswaneni eminengi eMatabeleland North selikhuphe idlalade lalo lokuqala ngenhloso yokuthuthukisa umculo wabafundi kule indawo.
Iqembu leli likhuphe idlalade elibizwa ngokuthi Siphofu saseJericho ngeviki ephelileyo. Idlalade leli lilengoma ezilitshumi.
Kubikwa ingoma ezikulelidlalade ngezokholo ngaphandle kweyokucina lapho abahaya khona umphathisikolo wabo ngomsebenzi omuhle awenzayo.
UMthunywa uxoxe lomhlabelisi weqembu leli, uBenedict Mabutho ochaze ukuthi sekulesikhathi eside eqeqetshisa iqembu leli njalo likhanya lisenza kuhle kakhulu emincintiswaneni kungakho nje bekhethe ukuthi bapheke idlalade.
“Sesiside isikhathi iTsholotsho isenza kuhle kakhulu kwezokucula. Ngomnyaka ka2013 saba zintshantshu ezakhokhela zonke izikolo kuleli.
“Siphinde njalo saphuma silandela iSt Maris Chitungwiza ngomnyaka ophelileyo kumncintiswano wezwe lonke.
Lokhu yikho okusiphe umfutho wokukhupha idlalade ukuze iziphiwo ezikhona lapha zibonakale njalo sizilondoloze,” kutsho uMabutho.
Omunye wababalisi ongathandanga ukuqanjwa ngegama uthe idlalade leli balikhuphe sekusele insuku ezimbalwa ukuthi kube lilanga lokupha izicoco kubafundi.
Intatheli ibikelwe ukuthi kulamadoda agoqela uVelaphi Gumbo loJoe Maseko abasebenze nzima ukuncedisa ukuthi iqembu leli lenelise ukukhupha idlalade leli ngokubapha indawo yokuphekela idlalade leli.
Ngaphandle kokukhipha idlalade, iqembu leli selenelise ukupheka omunye umculi osezimele yedwa okuthiwa nguIsaac Mpofu.
