uMthunywa
Thokozile Mbedzi
INKAMPANI ebona ngokulungiswa kwenhlanyelo eye-SeedCo isiyethule umhlobo omutsha wenhlanyelo yomumbu olakho ukuhlanyelwa endaweni ezehlukeneyo ezisemhlubulweni ongezansi yelizwe ozenza abalimi abakule indawo babe lenzuzo ephezulu.
Kubikwa inhlanyelo entsha yomhlobo weSC547 izaphathisa abalimi ukuthi batshaye inala okuzenza ukudla kwezimuli kube kunengi lesiphala selizwe laso sigcwale.
Ukudla kungaba kunengi esiphaleni selizwe kulakho ukuthi kuthengiswe kwamanye amazwe kutholakale imali yakwamanye amazwe.
Ekhuluma ekumbukiso weZimbabwe International Trade Fair kuviki ephelileyo uNkosazana Juliet Mbayiwa ongu-salesperson enkampanini yeSeedCo uthe balungise umhlobo lo wenhlanyelo omutsha ngemva kokunanzelela ukuthi umumo womkhathi usuguqukile.
“Inhlanyelo le siyilungise ngemva kokubona ukuthi umumo womkhathi osukhona udinga inhlanyelo engamelana lawo enje nge-SC547.
“Inhlanyelo le iSC547 ihle yangena endaweni yeSC513 le-SC555. Inhlanyelo le ilomfanekiso webhiza ngakho abalimi sebelakho ukuyithola ezitolo zethu kunye lemkambo eqondileyo,” kuchasisa uNkszn Mbayiwa.
Zimbabwe International Trade Fair
“Sikhuthaza abalimi kundawana zonke eziseMatabeleland ukuthi bamukele inhlanyelo le, ngoba ilungele indawo yabo ukuze bathole isivuno esihle. Umfanekiso webhiza ufakwe ngoba sinanzelela ukuthi ibhiza limelana lomkhathi osemhlubulweni weMatabeleland.
“Inhloso yethu yikuthi abalimi bathole inhlanyelo eqondileyo ehambelana lomkhathi walapho abahlala khona ukuze babe lesivuno esihle,” kutsho uNkszn Mbayiwa.
Uphethe ngokuthi abalimi nxa bengathola inhlanyelo eqondileyo baba lenzuzo enhle.
“Abalimi nxa bengathola inhlanyelo efanele indawo abakuzo kubalula ukuthi bangalima bathole inzuzo enhle okwenza izimuli zithole ukudla okwaneleyo kukanti lelizwe lalo libe lokudla okunengi esiphaleni selizwe okulakho ukuthengiswa kwamanye amazwe okusiza ilizwe ukuthi lithole imali yakwamanye amazwe.
“Sikhangelele ukuthi lonyaka abalimi nxa bethenga inhlanyelo yabo yesigaba sokulima sika-2023 -2024 bakhumbule ukuthenga inhlanyelo le ukuze babe lesivuno esiphezulu,” kuphetha uNkszn Mbayiwa.
